181/2022-2023
Aizawl, 18th April, 2022 : Health Minister Dr R.Lalthangliana chuan vawiin khan India ram hmun dangte ruala buatsaih Hriselna Kutpui (Block-Level Health Mela) Aibawk RD Blockah hawngin hun a hmanpui, Aibawk RD Block pual Health Mela hi Sialsukah nghah a ni.

Health Mela hawnna inkhawm buatsaihah khuallian Dr R. Lalthangliana chuan sawrkar laipuiin mipuite, a bik takin khawpui lia na cheng ve lote hriselna a ngaih pawimawh em avangin India ram pumah Block-Level Health Mela neih turin ruahmanna a siam hi a lawmawmin mipuite pawhin kan chhawr tangkai ngei a tul a ni, a ti a. Mizorama chengte chu mahni taksa hriselna tun aia uluk zawka inchik mamawh kan ni tih sawiin, natna kan neih kher nghak lova kan taksa hriselna dinhmun kan ngaihven reng hi a pawimawh a, kan hriselna hi kan hmalam hun hriltu pawimawh tak a nih avangin ka hriselna atana pawimawh inenkawl uluk te, ei leh in hrisel, mut hunbi mumal neihte bakah taksa insawizawite hi mitinin harsa lo taka kan tih ve theih a ni, a ti a. Kan hrisel tha emaw kan tih lai pawh hian hunbi neia inentir ching ila, nat hrep tawh hnua damdawi in pan ngai thin hi engemaw chen chu kan pumpelh thei ang a ti a. Mi zawng zawngin hei hi ngai pawimawh se a duh thu sawiin, Health Mela chu chhawr tangkai theih turin mipuite a chah a ni.

Health Minister chuan ZMC tihlenna tur hmalakna kalpui mek a nih thu sawiin, PM Ayushman Bharat Health Infrastructure Mission hnuaiah khum 50 awmna Critical Care Block siam a nih tur thu a sawi a, Champhaiah hetiang bawk hi dah a nih tur thu a sawi bawk. Sialsuk-ah damdawi in cheng vaibelchhe 2 senga sak chu reiloteah zawhfel a nih tur thu sawiin, Sialsuk PHC hnuaia Sub-Centre 3 : Lamchhip, Samlukhai leh Sumsuihte chu Health & Wellness Centre ah hlankai an nih thu leh Mizoram chhunga Health Sub-Centre leh PHC zawng zawngte chu Health & Wellness Centre ah hlankai vek an nih tur thu a sawi a, thawktute indaihlohna phuhru turin tan an la reng tih a sawi bawk.

Health Minister chuan Health Mela a hlawhtlin theihna tura Sialsuk khua a tlawmngai pawl hrang hrang YMA, MHIP, MUP, Sawrkar hmathawkte bakah VC leh Self-Help Group hrang hrangte tanrualna fakawm a tih thu sawiin, Mizoram Chemists & Druggists Association ten a thlawna damdawi am thawh chu lawmawm a tih thu a sawi bawk.

National Health Mission, Health & Family Welfare Department Mizoram mai bakah Education Department, DIPR, Women and Child Development, Rural Development, Sports & Youth Affairs, Ayush, Food Safety, Urban Development and Poverty Alleviation(UD&PA) leh Art & Culture Department ten theihtawp chhuaha tang hovin Hriselna Kutpui(Health Mela) hi buatsaih a ni. Mizoram chhunga RD Block 26 ah Health Mela hi neih tura ruahman a ni a. A neih hun tur hi nikhat thil thu ah inrual vek lo mahse, RD block tin ten Ministry of Health & Family Welfare duhdan angin April ni 18 atanga ni 29 inkarah mahni remchang dan ang leh hotute remruatna ang zelin an hmang dawn a ni.

Block level Health Mela, Mizoram huaihawt tur ah hian heng a hnuaia tarlan te hi tih tur a ruahhmanna siam a ni:

1. Damlo inentir zawng zawng te tan damdawiin a an health record hrang hrang an dahthat na tur Health ID siamsak an ni anga (ABHA ID) leh Healthcare hnuaia health insurance card (Ayushman Bharat PM-JAY Card) siamsak an ni bawk ang.

2. Non-Communicable Diseases(NCD) screening (zunthlum, BP sang, ka chhung, hnute leh chhul Cancer) test a ni ang.

3. Specialist Doctor hrang hrang clinic neih. Heng (Medicine, Surgery, ENT, Eye, Dental, Obs & Gynae, Paediatrics) Specialist te hian clinic neiin a thlawn in damlo an en anga, a tul dan ang in Investigation leh damdawi a thlawn a sem a ni bawk ang.

4. Taksa hriselna atan a thil pawimawh chi hrang hrang te zirtirna hun hman a ni bawk ang.

5. Taksa sawizawi/exercise/Yoga emaw tih nan hun hman a ni bawk ang.

6. Natna leh hrileng hrang hrang te tihkian nan a National Health Program hrang hrang (Nu leh naute hriselna te, indanna chungchang te, HIV/AIDS te, Zuk leh hmuam leh ruihhlo tihrehna tur te, Cancer program te, Leprosy, TB, Malaria leh Vun natna, Mit (Eye) leh a dang te) in hrilh hriat na tur IEC semchhuah a ni bawk ang.

Aibawk RD Block Sialsuk-a nghah hawnna inkhawm hi Sialsuk VCP Pu R. Lalruatkima'n a kaihruai a, Khualzahawm Dr F. Lallianhlira, Principal Director, H&FW leh Aizawl West CMO Dr Thani Pachuau teh thusawina hun an hmang a, Dr Linda Lalbiaknungi, MO, Sialsuk PHC in lawmthu sawina hun a hmang a ni.

Vawiin Health Mela ah hian ZMC daktawr thahnem tak telin, Aizawl atangin daktawr leh hriselna lama thawktu mithiam thahnem tak an tel a, Food Testing Laboratory Van leh TB Laboratory Van te pawh chhawpchhuah a ni bawk.