180/2022-2023
Dated Serchhip, the 18th April, 2022: Vawiin khan Chhingchhip Community Hall ah Azadika Amrit Mahotsav lawmna kal zel hmalakna peng pakhat atan Ministry of Health & Family Welfare ruahman angin Chhingchhip Community Hall ah Serchhip Block Level Health Mela huaihawt a ni a. Chhingchhip leh a chhehvel khuate tan a thlawna inentirna hun buatsaih a ni.

A hawnnaa khuallian Pi Nazuk Kumar, IAS, Serchhip Bawrhsap chuan, Chhingchhip leh a chhehvel mipuite tana Health Mela hlu tak buatsaihtute chungah lawmthu sawiin, he Mela a hlawhtlin theih nana thawktute zawng zawng chungah lawmthu a hrilh a. An inpeknate chu mipuiten an tangkaipui hle dawn a ni, a ti. Chhingchhip leh a chhehvel mipuite pawh a lawmpui thu sawiin, district chhunga daktawr thiam ber berten an khuaah ngei an kalchilh hi lo hmang tangkaia, a mamawh apiangten lo pan ngei turin a chah bawk. Pi Nazuk Kumar chuan, natna tam tak hi nunkawng thianghlim leh felfai tak hmanga inven theih a ni a, mipuiten nunphung hrisel leh thianghlim lam kan uar deuh deuh a tul hle. Tin, natnate hi hma taka hmuhchhuah chuan enkawl dam a awl zawk thin avangin rang taka damdawiin pan thuai nachang hriat a pawimawh thin hle, a ti bawk. Sawrkarin mipuite hriselna atana hma a lakna hrang hrang leh tunhnaia chung hmalakna district chhunga kalpuite leh hmachhawp hnaivai awm mekte a tarlan bakah Covid19 hripuiin min la chim renga, mipuiten vaccine lak lamah tan lo laa, himna dan (CAB) te tha taka lo zawm zel turin a chah bawk a ni.

A hawnna inkhawm hi Dr. Lalzawmi, CMO, Serchhipin a kaihruai a ni.

Vawiin Health Mela ah hian inentirna hmun Stall 22 buatsaih a ni a. A hawnna inkhawm neih zawhah inentirna hi kalpui nghal a ni a, mipuiten an hlut hle a ni.

He hriselna kutpui hi National Health Mission, Health & Family Welfare Department Mizoram mai bak ah Education Department, DIPR, Women and Child Development, Rural Development, Sports & Youth Affairs, Ayush, Food Safety, Urban Development and Poverty Alleviation(UD&PA) leh Art & Culture Department te nen tangkawpin an buatsaih a ni a. E. Lungdar Block level Health Mela pawh karleh lamah buatsaih leh tura ruahmanna siam a ni.