2434/2024-2025

Aizawl dated 9th October 2024: Vawiin chawhma khan Pi Lalrinpuii, Minister, Health & Family Welfare Department chuan State Drug Testing Laboratory, MINECO-a tlawh a. Pi Sangchhin Chinzah, Secretary, Dr. Vanlalsawma, Principal Director, Pu Lalsawma Pachuau, Joint Director, Food & Drugs Administration, Pu F.Lalliantluanga, Deputy Director leh thawktu dangte he hun ah hian an tel a ni.

Health Minister Pi Lalrinpuii chuan mihring hriselna enkawl nana damdawi kan hman te endikna tur State Drug Testing Laboratory bun a nih hnu ah a tak a hman tan a la ni lo chu pawi a tih thu a sawi a. Hnathawktu indaih loh vang a damdawi endik ngai te Regional Drugs Test Laboratory, Guwahati-a thawn thlak zel a ni thin chu pawi a tih thu a sawi bawk a ni. Minister chuan Ministry of Health & Family Welfare hnuai a ‘Strengthening of State Drugs Regulatory System’ kaltlangin State Drug Testing Laboratory building sak a nih bak ah khawl tha leh changkang tak tak lei a ni chu lawmawm a tih rualin mipuiin an hman tangkai thuai theih nan thawktu indah vat a pawimawh thu a sawi a. A tak a hman tangkai thuai a nih theih nan a tul anga hma la turin thawktute a chah bawk a ni. 

Pu Lalsawma Pachuau, Joint Director, Food & Drugs Administration tarlan danin Drugs Testing Laboratory Building hi Central project - Strengthening of State Drug Regulatory System’ (SSDRS) atang a sum cheng vaibelchhia 9 hmangin kum 2021 khan sak niin damdawi endikna khawl chi hrang hrang 36 a keng tel a. Hman mai theihin High Performance Liquid Chromatography leh Gas Chromatography chu rem khawm fel tawh a nih thu a sawi. Pu Lalsawma Pachuau chuan tunah hian Drugs Testing Laboratory hi a tak a hna thawk tur chuan thawktu lak belh a ngaih thu sawiin tun dinhmun ah thawktu Junior Analyst – 3 posts, Laboratory Attendant – 2 posts, LDC – 1 post leh IV Grade – 2 posts te chu sawrkarah dil mek a nih thu a sawi bawk a ni.

Thawktute tarlan danin State Drug Testing Laboratory hi a nih dan tur a kalpui a nih chuan, kum khat ah damdawi sample 1000 en dik thei tur a ngaih a ni a. A chhung a khawl awm te hi changkang leh chhuak thar ber berte an nih thu an sawi a. Kum 2022-23 chhung a damdawi endik tur a thawn chhuah 121 atang a 17-te chu ‘Not of Standard Quality’ an ni tih hmuhchhuah a ni.