2435/2024-2025

Aizawl 9th October, 2024 : Vawiin khan Vety Polyclinic Hospital Conference Hall, Khatla, Aizawl-ah Vawk suat (culled) avanga zangnadawmna semchhuah phalna (Release) hun leh African Swine Fever (ASF) chungchang inzirtirna hun neih a ni a. He hun hi Pu C. Lalsawivunga, Hon'ble Minister, AH & Vety Department chuan a hmanpui.

Minister chuan ASF hrileng hi kan state-in kan tuar nasa hle a, State Disaster-ah dan leh dun tihfel hnu-a puan turin hmalak mek a ni a ti. Vety department chu thawktute an indaih lo nachungin an phak tawka he natna dona kawnga an hmalakna te chu fakawm tiin thawktute chungah lawmthu a sawi a. Ranvulhtute tana innghahna tlak ni zel tura tan la sauh sauh turin a chah a. Sorkar pawhin theihtawp a chhuah zel bawk a ni a ti. 

Vawk vulhtute rilru put hmang moral reforms kan mamawh thu sawiin ASF avanga vawk thi te tuihawk luankawr, khama paih leh uluk lo taka phum ching an awm thin chu pawi a tih thu sawiin he natna a darh zel loh nana fimkhur turin a chah a ni. ASF avanga thite sumdawnna a hmang a, zuar an awm thin chu tawp se a duh thu a sawi. 

AH&Vety Minister chuan ASF hri chu ven leh tihdam a nih theih nan sorkar laipui-ah a damdawi leh hri danna vaccine siam emaw ram dang atanga lak luh dan tur ngaihtuah turin department chuan Sorkar laipuiah a thlen thu a sawi a. Kum 2024 chhung October Ni 7 thlengin Vawk thi 13809 awm tawhin 23010 suat tawh a ni tiin Vawk suat Compensation hi Kum 2025-2026 chhung Assistance to State for Control of Animal Diseases (ASCAD) Action Plan-ah telhin Govt. of India-ah dil leh tur a ni a. Compensation funding pattern hi 50:50 anih avangin Mizoram sum tam tak a kal ral a. Hei vang hian 90:10 a min tihsak turin dilna pawh thehluh tawh a ni a. North Eastern States dangte nena inthurualin bawhzui tum mek a nih thu a sawi bawk a ni. 

Vawiina Zangnadawmna Release hi Kum 2022 chhunga vawk suat sak chhungkaw 1847 hnen thleng tur niin cheng Nuai 263.32 release a ni a. Tun tumah hian 25% niin a bak 75% pawh hmuh leh thuai beisei a ni. Zangnadawmna hi District tina thuneitute'n an District theuhah an sem chhuak leh dawn a ni. Hetiang hi District hrang hranga semchhuah dan chu a ni. 

Aizawl - 347

Champhai - 490

Hnahthial - 206

Khawzawl - 14

Kolasib - 24

Lawngtlai - 386

Lunglei - 37

Mamit - 179

Saitual - 18

Serchhip - 59

Siaha - 87

Total - 1847

He hun hi Dr. R. Zothanmawii, Director, AH&Vety Department chuan kaihruaiin Mizoram Pig Farmer Association hruaitute atangin thusawi ngaihthlak a ni bawk a. ASF chungchanga hriat tur pawimawh tak tak inzirtirna neih chhunzawm a ni.