2436/2024-2025

Aizawl, October ni 9, 2024: Vawiin khan Irrigation and Water Resources Minister Pu PC Vanlalruata hovin Department hnathawh dan thlirletna Mid Term Review neih a ni. He hunah Irrigation & Water Resources Department hnuaia Division leh Sub Division hrang hranga hnathawh dan sawiho a ni a. Scheme leh project hrang – National Hydrology, Rationalization of Minor Irrigation Statistics (RMIS) , Pradhan Mantri Kisan Urja Suraksha evam Utthaan Mahabhiyan (PM KUSUM), NABARD, PMKSY-Har Khet Ko Pani, Flood Management Programme leh Brahmaputra Board hnuaia project hnathawh dan te thlirhona mid term review ah hian neih a ni.

Mid Term Review meeting ah hian Pu PC Vanlalruata, Minister chuan khawvel changkang chho zelah hmasawnna in tui mamawhna a ti sang zel a, tui hna leh tui humhalh chu mitin mawhphurhna a nih thu a sawi a. Sawrkar in thingtlangah leh khawsak harsa zawkte tan-a scheme leh project a chhawpchhuah sak te tangkai leh daihzai taka hman a nih theih nan ngawrh zawka hma la turin officer te a chah a. 'Kan hnathawh hian mi harsa te inchhung thleng phak se, hmasawnna chu mirethei ten a taka an hmuh zel hi kan mawhphurhna a ni tih hre nawn a, thawktuten theihtawp chhuah a, bul leh bal a kan intodelh nan irrigation leh tui kaihhnawih a nasa zawkin thawk ang u' tiin Department te chu a sawm a. Minister chuan hna tha leh belhchian dawl thawk zui zel turin leh officer te'n thlithlai zui kawngah tan la bawk turin a chah a ni.

Minister chuan Mizoram Sawrkar in Water Policy 2020 leh Water Resources Act 2024 te ngun taka zir chian leh mek a nih thu sawi bawkin, Mizoram in tha zawk leh chhenfakawm zawka tui leh tui hna tih pun kawnga tan lak a nih tur thu a sawi a. Department dangte nen pawh inrawn khawmna an neih chhoh mek thu te sawiin, theihtawp a tui leh tuihna tih pun hi thawktu zawng ten tan la thar leh turin a fuih bawk.

He Mid Term Review hi Pu V. Lalengmawia, Additional Secretary, Irrigation & Water Resources Department in a kaihruai a, Division leh Sub Division hrang hrang atangin powerpoint presentation hmangin hnathawh tawh dan te thlir ho a ni.