Health & Family Welfare minister Dr. R. Lalthangliana chuan vawiin chawhma khan Falkawna State Referral Hospital a tlawh a, Excise & Narcotics Department Minister Dr. K. Beichhua, Aizawl South-III bialtu MLA  F. Lalnunmawia, Dr. F.Lallianhlira, Principal Director, Health & Family Welfare leh Dr. T. Lalhmangaihi, Director, Hospital & Medical Education ten an tawiawm a, State Referral Hospital a Medical Superintendent Dr. Lalhmuchhuaka leh a thawhpuiten an lo dawngsawng a ni.

Health Minister hian State Referral Hospital a ward hrang hrang a tlawh chhuah vek bakah Laboratory leh ICU chi hrang hrangte a tlawh a, an hnathawh dan leh mamawh an neih te, harsatna an tawh te chipchiar takin a ngaithla a ni.

Damdawiin a tlawh zawh hian State Referral Hospital a thawkte hma ah thu sawiin Minister chuan an party in sawrkarna an siam hmasak laia Referral Hospital tur bul an tan tirh a an ngaihtuahna awm pha ngailo thil thar tam tak khawvel thiamna leh technology hmasawnna in a ken a awm tawh a, thil tha leh tangkai tam tak tihbelh tur a awm a ni a ti a, ICU a Oxygen khawl siamthat ngai pawh a rang thei ang bera siamthat nghal anih tur thu sawiin khawvel changkang chho zelah thil thar tam tak a awm reng a, Hospital a thawkte pawh hmasawn zel tura thiamna an neih belh zel a pawimawh dawn a ni a ti a, Mizorama damdawiin lian ber kan neih hi Sawrkarin a ngaihthah dawn lova a tihchangtlun kawngah leh chhawmdawl kawngah theihtawp a chhuah dawn a ni a ti bawk. Bible a Lal Isua rawngbawlna pawimawh ber pakhat tihdamna rawngbawl hna chhunzawmtute an ni tih hria a Pathian rawngbawlna a ngai a theihtawp chhuah a damlote thlamuantu leh beiseina petu ni zel turin duhsakna a hlan a, Hospital a damlote pualin Krismas leh Kumthar chibai bukna atan Rs. 10,000/- a hlan bawk