Vawiin khan UD&PA Minister Pu Zodintluanga’n ama office chamber-ah ‘Mizoram Khawpui Fai Inelna 2018’ a hawng a, he inelnaah hian nikum ang bawk khan District Headquarters leh Other Urban Towns belkhawmin khaw 23 an inel leh dawn a ni. Vawiin Inelna hawnna inkhawmah hian UD&PA Secretary Dr.C.Vanlalaramsanga, AMC Commissioner Pu Dr.H.Lalthlangliana, UD&PA Dy. Director-te Pu R.Lalzidinga leh Pi C.Laltleipuii bakah District 8 atanga lo kal DUDO-te leh UD&PA Department staff te an tel a ni.

Hawnna inkhawm UD&PA Secretary Dr.C.Vanlalaramsanga kaihhruaiah Khuallian Pu Zodintluanga chuan Mizoramin faina kawngah hmasawn tur chuan sorkar leh mipui ten thawhhona tha an neih a ngai a, Aizawl-ah chuan AMC awm tak chinah chuan nasa takin khawpui chhung tihfaina lamah UD&PA Department hna a chhawk ve thei ta chu a lawmawm hle a ni, a ti a. Faina kawngah hmalakna thar a awm zel a, heng hi mipuiin an thlawp that a pawimawh a; tun atanga reiloteah bawlhhlawh tawih thei leh tawih theilo te pawh a paih dan tur dik tak, a hrana paih dan tur mipuite zirtir zel chungin tih tan a ni tawh dawn tih a sawi bawk. Aizawl leh District khawpui lamah te bawlhhlawh paihna hmun ‘dumping ground’ changtlung zawk leh hrisel zawka bawlhhlawh sawngbawl dan tur sorkarin a ngaihtuah mek bawk a ni, a ti. Mipuite faina lama hrilhhriat turin thalaite thawkchhuak zel tura fuihin Minister chuan Lunglei District-ah faina lama mipuite zirtir leh chak taka hma la pawl ‘Clean Lunglei’ hmalaknate chu a fakawmin district dangte tan pawhin a entawn tlak a ni, a ti. Tuna Mizoram puma khawpui fai inelna turah pawh hian endiktute lo kal dawn avang chauha  hnatlang koh chawpa khawlai tifai lova, nitin mahni phak tawka faina kengkawh a, nunphungah neih a pawimawh a ni, a ti.

UD&PA Secretary Dr.C.Vanlalaramsanga pawhin thusawiin ‘Mizoram Cleanliness Competion’ hi nikumah a hmasa ber atan neih a ni a, nikum September atanga kumin September thla chhung hi ‘Cleanliness Year’ ah puangin, he inelna hi nikum ang bawk khan September thla ni 1-20 chhungin endik hna thawh tum a ni, a ti. Nikuma Mizorama khaw fai bera puan Biate chuan ‘Best City in Innovation & Best Practices NE Zone 2018’ lawmman an lak thu a sawi bawk.

UD&PA Dy.Director Pu C.Laltleipuii chuan ‘Mizoram Khawpui Fai Inelna 2018’ chungchanga presentation a nei a, he Inelna chungchang hrechiang duh tan hi UD&PA official website www.udpamizoramnic.in ah a guidelines leh hriat tur thil pawimawh dangte chu dah a ni bawk a ni tih a sawi.

Tunlai khawvelah chuan Faina kawngah inelna thianghlim neih a lo ni ta zel a. A bik takin Central Sorkar-in Swachh Bharat Mission (Urban) 2015-a a duan chhuah atang phei kha chuan India rama khawpuite hi faina kawnga inelna ‘Swachh Suvekshan’ neih a ni thin a. Kum 2016 leh 2017 te neih ni tawhin, Aizawl khawpui hi AMRUT CITY a nih angin tel ve zelin a ranking pawh a ziahawm zel a. Kum 2017-ah phei chuan Aizawl khawpui chu ‘Fastest Moving State in Himalayan Region’-a thlan a ni nghe nghe.

Mizoram Khawpui Fai Inelna-ah hian ranking mumal taka siam a ni a, kum khat lo liam hnua inelna neih leh hma chu he faina ranking hi a ding reng dawn a, khawpui fai-te ranking a ni reng dawn a ni. Kum tin he inelna neih thin tura ruahman hi, a kum leha India ram pumpui khaw fai inelna ‘Swachh Suvekshan’ neih thin atana Mizoram khawpuite inruahmanna tha tak a nih pawh beisei a ni a. Chu mai bakah Mizoram mipuite, a bikin khawpuia chengte, faina lama hma an sawn zel theihna atan leh an lo changkan zel theihna atana rah tha a chhuah ngei Mizoram sorkar chuan a beisei a ni.