Vawiin khan  Directorate of School  Education  Conference Hall ah kum 2018 Teacher’s Day hman dan tur Pu H Rohluna Education Minister  hovin  sawiho ani a. Aizawl  leh District dang atangin member te an kal tha  hle.

Teacher’s Day- Zirtirtu te Ni hi India ram hmun dang ang bawk in Mizoramah pawh kum tin  khel lova urhsun taka  hman thin a lo ni tawh a, kuminah pawh uluk taka hman dan tur rel a ngaih thu  Pu H Rohluna  chuan sawiin  he hun hmang tura Aizawl leh District dang atanga lo kal member te hnenah an ngaihpawimawh avangin lawmthu a sawi a. Zirtirtu te hna leh mawhphurhna hi a sangin a pawimawh a, naupang te nun kaihruaitu, mimal leh chhungkua, kohhran leh khawtlang, ram leh hnam thlenga thiam thil hrang hrang  zirtira  naupang te mi pangai leh mi puitlinga chherchhuaktu an nih avang in chawimawi an phu a ni tiin Sorkar pawhin chawimawina  hrang hrang Zirtirtu tha te tan a lo duanchhuah  dan te a sawi a. Hemi chungchanga Sorkar thu chhuak leh  hmalak dan  tur ruahman te chu  lo ngaipawimawh thin tur in member kalkhawmte a chah nghal.

Pu K.Lalthawmmawia, School Education Director hnen atangin  thu rel tur Agenda leh nikum 2017 a Agenda bawhzui dan leh report hrang hrang te ngaihthlak niin member te nen sawiho ngaite sawiho zui zel ani.

Nikum leh kum hmasa lama Zirtirtu leh naupangte thawhkhawm leh Donation leh a dangte  atanga  sum hmuh chu  Dan in a phalsak angin  Zirtirtu leh an chhungte  damlo tanpui nan leh  Teachers Day senso atan te hman a ni a. Damlo te chu an nat dan azirin  Rs. 10000/-  leh Rs.7000/- a tanpui thin an ni a, Zirtirtu  tanpuina hi financial year khatah zirtirtu pakhat hnenah vawikhat aia tam pe lovin, a ngai ang hi  la hman ni se tiin  rel a ni. Nikum chhung khan Damlo 68 te hnenah tanpuina  hi pek a ni a, Zirtirtu te pual anih angin Sorkar sikul mai bakah  Private sikul te pawh tanpuina chungchangah hian inthlahrung lo  se an duh thu an sawi  bawk.

Teacher’s Day  a ram roreltu te  thusawi  puanzar kawngah theih anga hmalak bakah mahni mawhphurhna  theuh hlen in   programme tluang taka a kal theih nan tun atangin  mawhphurtu hrang hrang ten  tan lak  a ngaih dan te  rel ho nghal  a ni.