Vawiin chawhnu khan Health minister Pu Lal Thanzara'n Chawlhhmun Veng, MRJG Hqtrs bula Urban Health Centre sakna tur mimal ram pek ah Health Centre sak hna tan nan Foundation Stone a phum. Minister hi Aizawl West I bialtu MLA Pu K.Sangthuama, AMC CEO Pi M.Zohmingthangi, Health Department Principal Director Pu Lalrinliana sailo leh Health Department hotulu te an tawiawm a ni.
Chawlhhmun Veng-a Urban Health Centre sakna tur hmunhma hi Pu David Zama leh Prof Margaret Ch. Zama ten an fapa Joshua Lalremruata(L) hriatreng nan an ram 150X60 feet an pek a ni a. A sakna tur hi National Health Mission Plan budget 2014-2015 atanga ruahman tur a ni.
Health Minister chuan Mizoram ah hmasawnna ruhrel lian tak tak te din tur awm remchang thin mahse central Sawrkar in ramruak a duh hmuhtur a awm thin loh avangin harsatna a lo awm tawh thin a. Mimal thil phal ten, sum pek let phut hauhlova sawrkar leh mipui vantlang te mamawhna an hriathiamna zawn atanga an ram hlu tak an pe thin chu thil lawm awm tak leh entawn tlak a ni a ti a. Hmasawnna atan hriselna a pawimawh hmasa a, hei hi India sawrkar chuan a hriatchian avang in hmachhawp ropui tak tak te a siam teuhva. Heng hmalakna te hi a thawktu ten missionary rilru pu a an kalpui chauhvin a sawt thin a. Health department hnuaia hnathawkte pawhin an hna zahawm leh ropui tak chu an chhunzawm zel a ngai a ni a ti.Damlo enkawlna hna leh tihdam rawngbawlna hi Pathian rawngbawlna ah thawktu ten an pawm anih chuan an tan hna hreawm leh thawh hrehawm a awm loh tur thusawiin Health Department hnuai thawkte pawh nasa zawk a an hna te thawk zel turin a chah a ni.
Thusawitu dang bialtu MLA Pu K. Sangthuama pawhin sawrkar chu mipui ta anih angin mipui phungbawmna leh thlawpna tello chuan a kal thei thin lova. Sawrkar hmalakna ah te phunnawi mai thin lova hna chak zawka a thawh theihnan mipuiten sawrkar hmalakna ah te kan thlawp tlat zel thin a ngai a ni a ti.
Chawlhmuna a Urban Health Centre(UHC) hi kum 2004 atang khan mimal inluah a kalpui mek a ni a. Tun dinhmunah thawktu 15 :doctor 1, staff Nurse 4, health worker 3, lab technician 3, Grade IV 4 te awm mekin damlo enkawl hna an thawk a. He UHC hian veng 10 : Zonuam, Luangmual, Govt. Complex, Zotlang, Tuivamit, Tanhril, Sakawrtuichhun, Central Jail veng, PTC Lungverh leh Chawlhhmun Veng te a huam bakah ah hmun hrang atang pawhin mamawhtu tan chuan pan theih a ni.
