Vawiin chawhnu khan Health Minister, Pu Lal Thanzara chuan Zarkawt Recreational Centre-ah Spastic Society of Mizoram, Gilead Special School, Bawngkawn te ‘World Autism Awareness Day/Month’ a hmanpui. Khuallian Pu Lal Thanzara chuan thil pawimawh tak, ngaihtuah zui ngai tak leh, thawh tur hmabak tam em em, World Autism Awareness Day/Month hmang tura kal khawm te chungah lawmawm, a ti a. Kan ramah pawl ropui tak, vohbikte (differently abled) tana ding Spastic Society awm hi Mizo te kan vannei a ni, a ti a. Harsatna tam tak, bawidawnna te, lawman te, an enkawl te leh an chhungte nen anlo paltlang tawh a. Kum tam tak hnuah anmahni puitu tur, Autism lama harsatna neih vanga helam kawnga harsatna tawk ve te tana malsawmna nih duh, mi inphal, sum leh pai leh an hmunhmai phal taka vohbik-te tana hman tir thin tu, Pu Lal Dingliana leh Pi Dinpuii te’n Spastic Society an nei hi vannei, a ti bawk a. Tawn hriat nei an nihnate hi Mizo te tan an hlu leh zual a ni, a ti a.

Minister Pu Lal Thanzara chuan tun hnai kum 2-3 velah Autism hi Mizo naupangte zingah kan pung thar ta emaw tih tur khawp hian sawi a tam a, kan thiamna te a sang tawh mai bakah, a field a thawkte hmalakna nasa tak avangin awareness sang ta atanga inhriatchhuah thar leh inenkawl tamna te pawh a ni thei awm e, a ti a. Autism hi eng ang nge a nih teh reng tih hriat tuma a chhir ve chin atangin, a chang chuan enkawltute tan a beidawn thlak turzia a ngaituah thleng phak ve in a inhria a. Naute a lo piana an len hun nghahhlelna chhan ber pakhat chu inbiak tawn theih hi a ni a, kan in pawh theihna ber, inbiaktawn theihna a buai tlat chuan a hahthlak turzia hi dai ve lo chuan hriat thiam a har thu a sawi a. Nu leh pa tan pawn pawm thiam a har an tih te pawh hi awm a tih thu a sawi bawk a. Tihdam theihloh damchhung daih anga ziah a nih fo laiin, mi lar tak Autism vei sawi tur an awm thu te, chuchuan kan zavaia beiseina min pe tu ni se, a tih thu a sawi bawk a ni. Composer lar Mozart leh Scientist ropui Newton te pawh tun hnua an nun an zir chian hian, Autism vei ngei an nih rinna a len thu te pawh chhiar tur a tam a ni, a ti a. Heng zawng zawng hian Autism chu dam chhung daih pawh ni se, nunphung pangai tibuai lo thei anih chu sawiloh, mi pangai aia sang an nih theihzia ti chuang te an ni awm e, a ti a. Autism inhriatchhuahna hi khawvel tawpna a ni lo, tiin a fuih a ni.

United Nations Organization (UNO) chuan 2^nd April hi kum tin ‘World Autism Awareness Day’ atan a lo puang a, April thla chhung hi awareness thla atan a puang bawk a ni. Amaherawhchu, remchan zawkna avangin Mizoram-ah 18^th April hian Awareness Ni leh Thla hi hman kawp a ni a. Spastic Society of  Mizoram hnuaiah ‘Robert Lalawmpuia Centre for Autism’ awmin, tunah hian naupang pali an nei a, special teacher pakhat, helper pakhat leh therapist ten Autism Centre bik hi an enkawl a. He centre hi Com DEALL Trust, Bangalore te nen tang kawpin autistic naupangte enkawl tur bik mithiam ten Bangalore-ah zirtirtu te training course nei pui tawhin, Com DEALL atang pawhin mithiam bik te an rawn thawn thin a ni.

He hunah hian autistic naupang leh nu leh pa te, Spastic Society of Mizoram Member tha hnem tak te an tel a ni.