No.2964/2021-2022

Aizawl, 12th November, 2021 : Health & Family Welfare Department Minister Dr R. Lalthangliana chuan vawiin khan Taxation Department Auditorium, MINECO-ah Reproductive & Child Health, National Health Mission, Mizoram buatsaih “World Pneumonia Day” hmanpuiin naupang kum 5 hnuai lam zinga pneumonia vanga nunna chan ti tlem tura beihpui thlakna programme “Social Awareness and Action to Neutralize Pneumonia Successfully (SAANS)” a hawng nghal a ni.

He hunah hian Health Minister chuan thusawina hun hmangin Pneumonia hi India rama naupang thihna thlentu tam ber a ni a, India sawrkar chhinchhiah danah naupang kum 5 hnuai lam thihna zaa 14 hi Pneumonia vang a ni a, Mizoram bikah phei chuan India ram aia sang niin zaa 15 lai a ni,a ti a. Covid-19 pandemic atanga kan hriat angin Pneumonia natna hriatchhuah hma leh enkawl vat hian naupang thihna nasa takin a tihniam thei a, mitinte kan fimkhura naupangte dinhmun kan chik uluk a tul hle tih alang a ni a ti.

Minister chuan SAANS in a tum ber chu Pneumonia vanga naupang thi 1000 zela 5 ni mek chu kum 2025 ah chuan 1000 zela 3 a tihhniam hi a ni a, hei hi thil harsa tak pawh a ni maithei a, nimahse thil theih a ni a, chuvangin thahnem ngai taka kan tan tlan chuan kan hlen thei ngeiin a rinawm a ni, a ti a. SAANS Campaign in a ngaih pawimawh deuh deuh Naupang kum 5 chin hnuailam Pneumonia vei te enkawlna tha tak pek te, mipui vantlang hnenah Pneumonia vei lo tur a lo invenlawk tul zia sawi uar a Pneumonia vei te enkawlna tha pek inzirtir te, Pneumonia vei te enkawlna hmanraw hrang hrang tih changtlun te chu theihtawp chhuaha hma kan lakna tur a ni a ti a. Mithiam te zirchianna atanga an hmuh chhuah danin naupangte hi heng natna lakah hian a ven theih a, natna an pumpelh thei a, an lo vei hlauh a nih pawhin a hun taka enkawlna dik pek an nih chuan thihna a pumpelh thei a ni. Naute thlaruk a tlin hmaa nu hnute chauh pek leh chumi hnu lama chaw tha dang pek te, hridanna lak that tir te, an damloh a mithiamte rawn vat nachang hriat te, kut fai taka sil te, tuithianghlim in te, fai na uar tur leh ei rawngbawl nana khu siam thei thing hman uar lohte hi kan hmalakna tur pawimawh tak tak te chu an ni a ti bawk.

Minister chuan he hmalakna hian naupang kum khat hnuai lam thihna pawh nasa takin a ti hniam dawn a, kan ram hmel leh dinhmun a tha zawnga her danglam thei thil a nih avangin kan theih tawpin thawktu te zawng zawng pawh mahni zawn theuhah an mawhphurhna awm te hlen theuh turin ka chah a, Department hmalakna chauh hi a tawk lova, mipuite pawhin tum danga min lo thawhpui thin tawh angin he hmalakna tharah pawh hian a neitu an ni tih hria a thahnemngai taka hma la theuh turin a sawm a ni.

Vawiin inkhawm kaihruaitu Dr Eric Zomawia, Mission Director, NHM, Mizoram chuan pawl hrang hrang inzawmkhawm “Global Coalition Against Child Pneumonia” bultumin kum 2019 November ni 12 atang khan World Pneumonia Day hi hman tan a ni a, India sawrkar pawhin kum 2019 khan hemi pual hian SAANS hi a duang chhuak nghal a, nikum 2020 November ni 12 khan India ram State thenkhat chuan he ni hi hmang tanin SAANS an kalpui nghal a, Mizoram leh State tam zawkte chuan COVID-19 Pandemic vanga an kalpui theih loh hnuah kumin hian a vawikhatna atan kan hmang ve tan a ni, a ti a. SAANS hi November ni 12, 2021 atanga February ni 28, 2022 thleng kalpui tur a ni a, hetih chhunga hmalak dan tur felfai tak sawrkar laipuiin a duang sa vek a ni, a ti a. Hmalatu tur Health department hnuaia thawk mi chi hrang hrangte chu nikum lam khan training pek fel vek tawh an nih thu a sawi bawk.

Dr. Lily Chhakchhuak, DD(FW) & SPO (RCH) chuan SAANS chungchang leh nihphungte sawifiahin pneumonia chu natna huatthlala tak, naupang kum 5 hnuai lam zinga thihna thlen tam bertu natna a nih thu a sawi a, khawvel pumah naupang maktaduai 55 in he natna hi an vei thin a, an zinga maktaduai 1.6 in an thihpui tih sawiin, India ramah chuan naupang maktaduai 3 in he natna hi an vei thin tih a sawi a ni.

Naupangte zingah khuh, khawsik, hnute hne duh lo, hritlang awmna leh kaih nei an awm chuan a rang thei ang bera damdawi lam mithiamte rawn tur tih sawiin hemi atan hian ASHA leh Health Workerte thlengin training pek vek tawh an ni, a ti a. Thaw rang an nih chuan pneumonia an nei anga ngaih a nih avangin hlamchhiah loh tur tih sawiin, an thawk zawnga an awm hnuai lam a khuar kawk kawk phei chuan a serious hle tawh anga ngaih a ni, a ti a. hetih rual hian he natna hi ven theih a nih thu sawi lang telin mitinin naupangte hriselna leh awmdan phung uluk taka kan chik a pawimawh a, thlasika meilum kan ai naah naupangte mei hnaih lutuka awm tir loh a pawimawh bakah inchhung khar up lutuk loh tur a nih thu leh naupangte bula meizial zuk loh a pawimawh thu sawiin, hriselna leh chet thianghlim kawngah kan in uluk a tul hle a ti a, nau pianghlim zang lutuk kg 2 leh a chanve aia hnuai leh vaccine la tha lote, ei leh in titha lote zingah he natna hi a thleng hma duh bik tih sawiin fimkhur a tul thu a sawi a ni.

SAANS thupui atan sawrkar laipui chuan “Pneumonia nahi to, bachpan sahi (Pneumonia-free childhood is a happy childhood)” tih a thlang a ni.