No.2965/2021-2022

Aizawl, the 12th November 2021 : Vawiin khan Power & Electricity enkawltu Minister Pu R. Lalzirliana chuan St. Anthony’s Higher Secondary School in an zirlai HSLC leh HSSLC, Academic Session 2020-21 puala lawmpuina programme Chanmari YMA Hall a an buatsaih chu khuallian niin a hmanpui a. School neituten an zirlai naupang Top Ten a tling te cheng nuai khat theuh pek an tiam chu zirlai titha 4 hnenah a hlan bawk a ni.

Pu R. Lalzirliana chuan zirna in thatak din chhoh a nih mek laiin zirlaite hian thiamna tak tak an pawchhuak em tih chu zawhna lian tak nia a hriat thu sawiin thiam tak tak neih chu zirna tum ber a ni, a ti a. Zirna in tha din chhoh zel niin, tunah phei chuan veng tin leh khawtinah zirna in tha tak tak a lo ding chho ta hial a, eizawnna hrang hrang kawng in hawng zelin, sawrkar hnathawh aia eizawnna tha leh thlanawm zawk tam tak a rawn chhuakchho ve ta a. Heng hna thawk tur hian finna leh thiamna tak tak neih erawh a ngai tiin Mizoramah chauh nilo India leh khawvel hmun dangah pawh hna zawng hreh lo turin zirlai te hi a fuih a ni.

Minister chuan mi hlawhtling ni turin taihmakna leh tawrhchhelna neih a pawimawh thu sawiin kan chawrchhuahna chu eng pawh ni rawh se, kan Future erawh chu kan kutah a awm tiin zirlai naupangte chu a fuih a. Lehkha kan zirchhan hi enge tih hi inzawt nawn fo turin ka duh che u a, engnge nih ka tum? Ka nih tum tihlawhtling tur hian eng kawng nge ka zawh ngai tih hi inchhut nawn fo ula tiin zirlaite a fuih bawk a. Zirlai naupang ten an tum (goal) an thlen theihna tur atana an tih tur leh an kalna tur kawngte in enngun fo tura chahin an harsatna paltang tawh hrang hrang rawn tawng ve mekte tan pawh kawhhmuhtu leh Mizoram tan a mi chhenfakawm ni turin an zirlai leh an hnathawh zel turah duhsakna a hlan a ni.

Pu R. Lalzirliana St. Anthony’s Higher Secondary School chu zirna in naupang tak 2019 maia din ni chunga kum 2/3 chhung leka HSLC leh HSSLC result tha tak an nei chu fakawm a tih thu a sawi a. Hei hian zirlaite leh zirtirtu bakah thawktu hrang hrangte inpekna leh taihmakna a ti chiang hle nia a hriat thu a sawi a. Mizorama sikul tam takin an zirlai titha te chawimawi nan certificate leh incentive pe thin an awm fo a, chutih rualin, zirlai ten an zirlaiah phurna leh chona nei tura cash incentive nuai khat lai mai an ruahman hian he sikul hi eizawnna atan niloin zirlaite duhsakna leh Mizoram hmangaihna pu a kalpui a nihzia a tilang chiang hle in ka hria a, a ti.

Minister hian HSSLC 2021 Exam (Arts Stream) a sikul atanga Top 10 a lang zirlai 4 te hnenah sikul in pek an tiam cheng nuai khat theuh leh citation a hlan a ni.

He hunah khualzahawm Pu Zonunsanga Khiangte, MJA President chuan zirlaite chu an zirna kawngah leh an nunchangah te midangte tan entawntlak ni turin a chah a. Ram leh hnam hmangaih avangin Central Services lamah luh tum turin zirlai te a fuih bawk a ni.

St. Anthony’s Higher School hi kum 2019 a din niin 2019-20 leh 2020-21 HSLC leh HSSLC Exam ah te result tha tak an nei a. HSSLC 2021 khan Arts Stream a Toppers 4 an nei. Subject Toppers te pawh vawiin khan Rs. 30,000 /- theuh hlanin Distinction a pass zirlai te pawh lawmman an pe bawk a, a vaiin cheng 7,80,000 zirlai ti thate hnenah an hlan a ni.

Attachment

  • Loading attachment...