No.3489/2021-2022

Aizawl, 21st November, 2021 : Vawiin khan Health Minister Dr R. Lalthangliana’n Zoram Medical College, Falkawn-ah ZMC-a MBBS zirlaite awmna tur Ladies Hostel leh Gents Hostel bulding pakhat ve ve a hawng a, hemi rual hian Ladies Hostel leh Gents Hostel bulding pakhat ve ve sakna tur lungphum a phum nghal a ni.

ZMC Lecture Theatre-I a inkhawm buatsaihah thu sawiin Dr R. Lalthangliana chuan hripui leng vanga harsatna tam tak karah ZMC Ladies Hostel leh Gents Hostel bulding hawn a ni ta chu lawmawm a tih thu a sawi a, a hlawhtlinna hmel hmuh theih na tura hun, tha leh zung sengtu zawng zawngte chungah lawmthu sawiin, hripui leng karah ZMC hmasawnna tur kawng hrang hrangin theihtawp kan chhuah a, kan beisei angin hma kan la zau hleithei lova, chutih rual erawh chuan hlawhtlinna chi hrang hrang kan hmu mek tho hi thil chhinchhiahtlak tak a ni, a ti.

Minister chuan Hostel thar hawn bakah Hostel bulding 2 sakna lungphum kan phum leh thei hi a lawmawm a, kum 2 hnuah chuan Hostel tha tak 2 kan neih belh leh dawn a, a hun taka sa zo ngei turin Contractor te ka chah a ni a ti a, kumtin zirlai 100 lak zel a ngaih tawh avangin tun atanga kum 2 a ral leh chuan internship ti laite nen kumtin MBBS zirlai 600 vel kan nei reng tawh dawn a ngaih a ni a, hostel kan la inchan lova, a theih ang angin quarters sak satw cheibawlin zirlaite kan indah lut a, zirlai zawng zawng ten Hostel an chan theuh theih nan theihtawp kan chhuah zel dawn a ni, a ti.

COVID-19 hripui len tan tirh khan ZMC ah ICU khum 13 kan nei a, tunah chuan khum 48 lai kan nei tawh a, Civil Hospital Aizawl-ah khum 10 kan neih belh leh tawh bawk a, COVID-19 hripui a reh hnuah pawh damloten tangkai takin an chhawr thei dawn a, private damdawi in leh phai lama damlo serious tak takte ICU-a sum tam tak senga kan indah thin pawh nasa takin min chhawk zangkhai thei tawh dawn a ni, a ti.

Dr Thangtea chuan Health Infrastructure tha - thawktu tha leh thiam, hmanraw tha leh hmunhma tha hi kan ngaih pawimawh berte zinga mi a ni a, kan ram hmasawnna kawng pawimawh tak pakhat a nih bawk avangin nasa lehzualin tan kan la zel dawn a ni, a ti a. Kar kalta a Kolkata a zin tumin Apollo Hospital thuneitute a kawm tih sawiin, an Hospital-a daktawr thiam super-speciality daktawrte regular taka Mizorama rawn kal a damlote rawn en thin tura a ngen thu leh Apollo Hospital thuneitute pawhin an rem tih thu a sawi a, hei hian sum tam tak senga phai lama kan inentir senso min chhawk zangkhai thei dawn a ni, a ti.

Zoram Medical College chu daktawr thiam ringawt ni lo, damloten rinna an nghah ngam leh chhawr tlak tak tak, daktawr quality tha chherchhuahna hmun ni tura theihtawp chhuah zel turin a thawkte a chah bawk a ni.

Heath & Family Welfare Board Vice-Chairman Dr ZR Thiamsanga, MLA pawhin hripui leng kara ZMC in hmasawnna hmel thar tam tak a hmu chu lawmawm a tih thu sawii, Chief Minister Pu Zoramthanga, Health Minister Dr R. Lalthangliana, Health Department a thawktute leh ZMC-a thawkte thahnemngaihna leh taimakna a fakawm thu a sawi a ni.

Health Minister in vawiina a hawn tak Ladies Hostel leh Gents Hostel te hi NEDP sum Rs. vaibelchhe 5 ve ve senga sak a ni a, khum 72 ve ve a awm a, Zothan Consultancy Services, Chawlhhmun, Aizawl-a mite sak niin October ni 6, 2018 a sak tan niin, August ni 15, 2020-ah an sa zo a, sak zawh hun tura bituk chu October ni 5, 2020 a ni. Tunah hian heng hostel 2 hi SEDP kaltlangin vertical extension tih mek a ni a, khum 52 ve ve awm theih tura hisap niin hna hi 90% thawh zawh tawh a ni a, basement pawh khum 17 ve ve awm turin chei that mek a ni bawk.

Ladies Hostel leh Gents Hostel bulding thar sak tur vawiina Minister in lung a phum hi NESIDS, Ministry of DoNER kaltlanga Rs vaibelchhe 10 senga sak ve ve tur an ni a, Ladies Hostel hi October ni 27, 2023 a sak zawh tur niin a sa tur hian David Zohmachhuana, Zuangtui, Aizawl thlan a ni. Chhawng 7 a sanga sak tur niin single room 10 leh Double room 36 a awm ang a, khum 82 leng tur a ni. Total floor area hi 2518.57 sq.m niin lift dah a ni ang.

Gents Hostel hi October ni 29, 2023 a sak zawh tur niin a sa tur hian Mgurzamlova, Khuangpuilam, Kolasib thlan a ni. Chhawng 6 a sanga sak tur niin single room 10 leh Double room 36 a awm ang a, khum 82 leng tur a ni.  Total floor area hi 2518.57 sq.m niin lift dah a ni ang.