No.3488/2021-2022

Aizawl, the 21st December 2021 : Vawiin khan Chhipphir Branch YMA chuan kum 50 an tlin lawmna Golden Jubilee program YMA Zawlbuk, Chhipphirah an buatsaih a. He program-ah hian Tourism, SYS, leh ICT Department-te changtu Minister Pu Robert Romawia Royte chuan khuallian niin a hmanpui. YMA Zawlbuk, Chhipphir kawtzawla YMA Golden Jubilee Lungphun a hawng nghal a ni.

Chhipphir Branch YMA Golden Jubilee lawmna program-ah hian bialtu MLA Dr Vanlaltanpuia, Chairman Mizoram Youth Commission chu khualzahawm niin program-ah hian Sub Hqrs YMA Lunglei hruaitute, sawm bik dangte leh Chhipphir khawtlang mipui thahnem tak an tel a ni.

Pu Robert Romawia Royte chuan Mizorama khaw hlun leh khaw upa berte zing ami Chhipphir khua in YMA Golden Jubilee hmang theia Pathianin a hruai chu lawmawm a tih thu a sawi a, khaw mipui zawng zawngte duhsakna a hlan.

Minister Pu Robert Romawia Royte chuan pawl huap zau leh zahawm, ramri nei velo, Zofate min khaikhawmtu pawl ropui tak YMA kan nei hi kan vannei takzet a ni tiin Pathianin Zofate YMA min pe hi vawiinah lawmthu i sawi nawn ang u tiin kalkhawmte a sawm a.
Chhipphir Branch YMA Golden Jubilee lawmna kokim taka hun an hmang thei hian inlungrualna, hmangaihna a lantir tak meuh a, hun lo kal zel turah pawh inhmangaih a, in lungrual zel turin khaw mipui te a fuih bawk a ni. Ram leh hnam humhalh a ngaih pawimawh takzet thu sawiin Minister chuan hemi kawnga thil pawimawh hmasa ber chu mitinin mahni hna theuh taima taka kan thawh a, intodelh tura theihtawp kan chhuah tlan hi a ni, a ti a. Ram leh hnam humhalh tur leh kan hnam chak taka a than zel theihnan kan inthlahpun tama mihring kan pun zel a pawimawh bawk a ni tiin, Chhipphir Branch YMA Golden Jubilee chu ram leh hnam humhalhna kawngah harhtharna thlentu ni ngei se a duh thu a sawi a ni.

He huna khualzahawm bialtu MLA Dr Vanlaltanpuia chuan Chhipphir mipuite YMA Golden Jubilee chibai bukin Chhipphir leh a chhehvel khua te ti hmasawn zel turin theihtawp chhuah zel a tum thu a sawi a. Chhipphir gowdown thar sak chu tangkai taka hman mek niin Haulawng to Chhipphir kawng siam that hna pawh kalpui mek zel a ni a, Bualpui leh Chhipphir inkar pawh siam that thuai anih tur thu a sawi. Chhipphir tui lakna pump siam that hna pawh kalpui thuai tum niin hengte bakah hian hmasawnna ruhrel hrang hrang ruahman belh zel a tum thu a sawi a ni. Chhipphir khua chu khaw upa leh hlun, mithiam hmasa te lo chhuahna anih angin khaw dang te tana entawntlak leh zirna kawnga hmahruaitu dinhmun luah leh tura theihtawp chhuah turin a chah a ni.

Pu Lalrotluanga, President Sub Hqrs YMA Lunglei chuan Chhipphir Golden Jubilee puala Souvenir an buatsaih chu tlangzarh in YMA hi khawtlang tan a tangkaizia leh hlutzia a sawi lang a ni.

Vawiin vek khan bialtu MLA Dr Vanlaltanpuia chuan Chhipphir YMA Library thar, Raja Rammohun Roy Library Foundation (RRRLF) Kolkata kaltlanga cheng nuai 6 senga ruahman chu a hawng bawk a ni.

Khuallian Pu Robert Romawia Royte chuan Chhipphir YMA Library thar a hman tur computer set a pek bakah Chhipphir khaw tan hian jersey, table tennis table, leh football te hlanin volleyball court leh futsal ground te ruahman sak tura hmalak a tum thu a puang bawk a ni.

Chhipphir Branch YMA ah hian tun dinhmunah member mipa 447, hmeichhia 287, a vaiin member 734 an awm mek a ni.