Nimin (20.11.2017) khan Health Minister Pu Lal Thanzara chuan Kolkata-ah AMRI Hospitals hotute nen inkawmna neiin, Mizoram Sawrkar leh AMRI Hospitals thawhhona awm mek bakah Ha siamthatna Dental Implant chungchangah te, Bone Marrow transplant chungchangah te leh Neurology Clinic leh natna dang chungchanga thawhona kawng awm theih dan te an sawiho a ni.

Health Minister Pu Lal Thanzara chuan Dental Implant hi a case azirin Medical Reimbursement tih theih leh theih loh chi a awm thin a, chu bakah a man a to avangin mi tam takin enkawlna an la thei loh fo thin thu sawiin AMRI Hospitals in Dental Implant man tlawm zawka an ruahman theih chuan mi tam tak tan malsawmna a nih tur thu a sawi a. AMRI Hospitals lam pawhin Dental Implant bikah chuan thawhhona an duan theih mai an rin thu an sawi bawk. Minister hian Mizorama thluak leh lu lam mithiam doctor(neurologist) rawn tur an awm loh avangin damlo ten harsatna an tawh thin thu te sawiiin, hemi kawngah hian Sawrkar pawhin harsatna sutkian theih dan kawng a dap thin mahse tun thlenga ruahmanna a la awm thei lo tih a sawi a.  AMRI Hospitals chu Mizoramah Neurology Clinic din dan kawng ruahman pui sak turin a sawm a, anni lam pawhin a thei ang angin he thil hi an lo zirchian tur thu an hrilh a ni. Heng bakah hian pum lam enkawlna tur Gastro Care, hnungzang leh ring na Spinal Injury leh Breast Cancer ah te pawh hma lakna awm thei te an sawiho bawk  ani.

Minister Pu Lal Thanzara leh amah tawiawmtu Pu Lal Rinawma, Principal Adviser to CM te chu AMRI hotuten an damdawi in 3 an fanpui a, an khawl leh hmanraw thar neih te an enpui nghalin Mizoram atanga damlo refer-te tan theihtawp chhuahin an enkawl zel tih an sawi bawk a ni.