Tukin chawhma dar 9:00AM khan Pu N.Zakhai, CEM, MADC chuan No-aotlah-III khuaa NEDP beneficiaries te tharchhuah Off-Season zikhlum chu Siaha District pawn lama zuar turin a vailiam.

No-aotlah-III (10KM) khua hi  Strawberry thar tam avanga Mizoram pumpuia hriat hlawh khua kha an ni thin a. Kumin 2017-ah erawh chuan a hun lovah ruahtui a tlak tam lutuk avang leh sik leh sa inthlak danglam nasa lutuk avangin Strawberry chu Verticilium sp.fungus leh white Scrub ten an bei nasa a, an strawberry chin 75% vel lai chu a tam  a ni. Sawrkar chuan Strawberry chingtute harsatna chu hriain, NEDP hnuai atangin an Strawberry chinna hmunah zikhlum( Off-Season Cabbage) chinna turin ruahhmanna siampuiin chhungkaw 22  hnenah tanpuina a pe ta a ni.

Zikhlum chi hi mi pakhat hnenah a tahtawlin 200gms zela pein, tunah hian an pek hmasak ho chu  seng tan tawhin, nakum 2018 February vel thlenga seng tur a awm an beisei a ni. NEDP hnuaiah hian zikhlum hi 2,93,300  vel phun a ni a, 2933 quintal vel thar theih tura beisei a ni. Kg-ah Rs.30/- zela an hralh chuan cheng nuai Rs.87.99/- vel lei chhuak theih turin an in beisei a ni.

Pu N.Zakhai hian Strawberry tam vek te hnena NEDP tanpuina pek bang chhungkaw 22 hnenah Rs.27,000/- theuhva sem nghalin, a vaia chhungkaw khat hnenah NEDP tanpuina pekchhuah hi  Rs.95,000/-a ni.

Pu N.Zakhai  chuan vawiin Zikhlum vailiamna programme-ah hian thu sawiin, No-aotla-III kuthnathawktute taimakna leh thawhrimna avangin  No-aotla-III khua  chu Mizoram chhunga khaw hriathlawh taka in siam tawh a. In Strawberry a vanduaina intawh pawh NEDP hmangin Zikhlum malsawmna-ah in chantir leh mek avangin ka lawmpui tak zet che u a ni, a ti. Kuthnathawktu rinawm leh taima, tih tak tak a hnathawktu te laka Pu Hawla kaihhruai sawrkar rilru put hmang leh thleibik a neih lo ziah chu No-aotlah-III khaw mipui te hian in hrechiang ber awm e. Chuvangin mitin ten rinawm tak leh taima taka kan hna theuh kan thawh hi Malsawm dawnna hnar a ni tih I hre thar leh theuh ang u tiin kalkhawm te a chah bawk.

Vawiin Off-season Zikhlum vailiamna programme hi Pu C.H.Lalmuanpuia, DHO Siaha District in a kaihruai a,Pu N.Lalsiama’n kuthnathawktute aiawhin thusawina hun a hmang bawk.