3496/2022-2023

Aizawl 6th February 2023: Vawiin khan Health Minister Dr. R.Lalthangliana chuan Asian Development Bank (ADB) hotute -Pu Nishant Jain, Health Specialist & Team Mission Leader, leh Pu Dai-Ling Chen, Health Specialist & Team Mission Co-Leader-te chu a pisa-ah a kawm.

Mizoram sawrkarin Asian Development Bank (ADB) atanga loan cheng vaibelchhe 1008 a puk tur chungchanga Aizawla rawn zin ADB hotute hi Health Minister leh Health Department hotute nen inkawmin, nikum June thlaa ADB loan pukna tur Ministry of Finance in a lo pawmpui tawh bawhzui dan tur leh chak zawka hma lak dan tur an sawiho a. Minister hian ADB chu kalphung felfai tak nei leh uluk taka thil an kalpui dan te a hriatpui rualin Mizoramin sum leh paia harsatna kan tawh avanga loan agreement tihfelsak thuai turin a lo hrilh a. He loan tihfel vat a nih theih nan thla khata vawi khat emaw lo zin a, Health Department official te nena sawihona neih tha a tih thu a lo chah a. ADB hotute hian Minister ngenna chu an ngaihpawimawh thu leh theihtawp chhuaha hma an lak tur thu an sawi a.

Minister hian kum 2009 ah ADB atangin Mizoram sawrkarin loan a lo puk tawh avangin thil thar a ni lo va, tun tuma Mizoram sawrkar dinhmun hriaa ADB leh Ministry of Finance ten min puih an tum chu thil lawmawm tak a nih thu a sawi bawk. Mizorama cham mek ADB hotute hian Chief Secretary leh Finance Department hotute nen meeting an nei tawh bawk a ni.