3497/2022-2023

Champhai, the 6th February, 2023: Champhai khawpui faina chungchanga hmalak dan tur leh, tui chia leh hnawm sakhat sawngbawla thliar hran kawnga hmalak dan tur chungchang ngaihtuahin vawiin chawhu dar 3 khan I&PR Conference Hall-ah District Bawrhsap, Pu James Lalrinchhana hova thutkhawm a ni.

District Bawrhsap Pu James Lalrinchhana chuan bawlhhlawh sawngbawl leh tihral kawnga hmalaknate National Green Tribunal (NGT) in ngun taka a vil reng thu leh dan zawm lova palzutna awmte a enliam mai mai loh thu a sawi a. Dan tha tak takte siam ni mah se, mipui hnena zirtirna pek leh ataka kalpui tura kenkawh a pawimawh thu sawiin, theihtawp chhuaha tha thlah lova kan tanrual phawt chuan a hlawhtlinna kan hmu thei dawn a ni, a ti a. Hman khat daih plastic/polythene-in leilung leh boruak nasa taka a tihchhiat thu sawiin, hriselna atan a him lova, tihrem tuma theihtawp chhuah mek zel a ni, a ti a. Hman khat daih plastic, thleng, no leh plate-te hmang lova hmanraw him zawkte hmanga Kohhran ten ruai an theh chu fakawm a tih thu a sawi bawk.

He hunah hian Pu F.Lalhriatpuia, JE, UD&PA Department Champhai chuan hnawm sawngbawla thliar hran kawnga hmalak tawh dante sawiin, Chhungte leh Tlangsam-ahte kalpui mek anih thu a tarlang a. Pi Baby Lalremtluangi, Manager, S&ME, DAY-NULM, UD&PA Department hnen atangin faina leh hnawm sawngbawl kawnga Department hmalaknate ngaihthlak a ni a. ODF Plus dinhmun a awm thei tura hmalak dante, hman khat daih hmang lo tura hmalakna bakah hnawm sakhat sawngbawlna dan, Solid Waste Management Bye Laws 2020, Champhai kalpui tawh dante a sawifiah a. CHANEM Building leh Sawrkar Pisa-te chu hman khat daih plastic hman lohna hmuna puan anih bakah Solid Waste Management Bye Laws, 2020 hnuaiah mi 7 te hrem an nih tawh thu a tarlang bawk.

Thukhawm chuan faina, hman khat daih plastic leh hnawm sawngbawla thliar hran dante tam zawka inzirtirna neih nise a ti a. Dan leh thupek pawh a tul anga tih chhuaha endik nise an ti a. Faina chungchanga inzirtirna puan tur tulte Kohhran hnena pek chhuaha zau zawka puan chhuah thin nise tih a ni a. Faina leh hnawm sawngbawla thliar hranna lam hawi inzirtirna leh hnatlang tam zawk neih nise tih a ni bawk.

Heng bakah hian VC, NGO leh Kohhran hotute atangin faina, single use plastic leh bawlhhlawh sawngbawl kawnga an hmalaknate ngaihthlak a ni a; an huang chhung theuha zau zawka inzirtirna kalpui dan turte sawiho a ni bawk.

Attachment

  • Loading attachment...