3498/2022-2023

District Level Committee on Fire Prevention, Hnahthial District buatsaihin vawiin khan Govt Hnahthial College Auditorium-ah Kangmei venna Hapta 2023 hawnna hun hman niin District Bawrhsap Pu R.Lalremsanga chuan Khuallian niin a hawng a, "Kangmei laka kan ram humhim hi mitin mawhphurhna a ni" tih thupui hmanga Video clip tawi intihsiakna lawmman sem nghal a ni bawk.

Khuallian Pu R.Lalremsanga chuan Mizoramah hian Kangmei chu kan hmelma lian berte zing ami tih theih hial a nih thu sawiin "Fimkhur tawk loh vangin kan vahbak ram kan ti kang duai duai a, Kut hlei leh suahsual vanga ram hal ching kan la tamin a hriat a, a pawi hle a ni. Hetiang mite avang hian kan thing leh mau a tlem tial tial a, kan mamawh chenna In sakna atana Thingzai tur pawh avang tawh hle a ni. Sik leh sak nise a danglam nasa in ruahtui tlak hun pawh a mumal tawh lova, kan Thing leh Mau te hi kan humhalh that loh chuan kan hmabak hi a thim hle a ni" tiin Chenna In sak chungchangah pawh ngaihtuahna thui tak put a tul thu sawiin "Sum duh luat avangin a rem leh rem lo pawh ngaihtuah lovin In kan sa a, Kangmei chhuah palha thelh that theih lohna tur hmun hi a tam tawh hle a, mumal taka kan In sak te hi kalpui a ngai tawh a, kan ram leh chenna In min tih chhiat saktu Kangmei lakah hian kan himna turin kan za vaia kan tan tlan angai a ni" tiin Hnahthial District mipui te chu Kangmei ven pawimawh zia hre thar reng turin a chah a ni.

YMA Sub-Hqrs Hnahthial President Pu B.Lalhmingliana pawhin Kangmei chhuah theihna kawng hrang hrangah fimkhur a tul thu sawiin In wiringah pawh a thiam ngei tih tir a pawimawh thu leh bungrua pawh a tlawm zawng mai lova a tha ngei hmang thin turin mipuite a chah a, khawsa thei deuhte phei chu Fire Extinguisher nei hram hram turin a ngen bawk a ni.

He hun kaihruaitu Pu F.Lalsangzuala, RO, Hnahthial Forest Range chuan Kangmei ven kawnga Hnahthial District hmalakna leh hmachhawp te sawiin Nikum 2022 chhung khan Hnahthial District-ah Ram kang a awm lo tih a tarlang a ni.

Kangmei venna kawnga inzirtirna Video Clip tawi intihsiaka lawmman dawngtute chu :-
1st Nauhruaikawn Section, YMA Lungleng Branch
2nd Lushai Production
3rd Linda & Friends
3rd The Chanmarians

Hnahthial-a Kangmei venna Hapta 2023 hawnna inkhawm neih hi Pi Saizikpuii Addl DC chuan lawmthu sawiin a khar a ni