Vawiin chawhma khan Health Minister Pu Lal Thanzara chuan Falkawn hmuna State Referral Hospital leh District TB Centre te tlawhin Hospital hnathawh dan te,Hospital in tun dinhmuna a mamawh zual deuh deuh te leh an indaihlohna te a endik a ni. Parliamentary Secretary Pu K.S. Thanga, Health Department Pricipal Director Dr.K. Ropari, Dr.Lalbiakkima, Director, Health & Medical Education leh Aizawl Civil Hospital Medical Superintendant Dr. Rosangluaia ten Health Minister hi an tawiawm a ni.

State Referral Hospital tlawhtu Minister leh mi pawimawh te hi Dr.Jane R. Ralte, State referral Hospital a Deputy Medical Superintendant leh Medical officer 5 ten lo chhawn in an mamawh hrang hrang zinga hmahmawh deuhva neih nghal ngai te an lo hrilh a. Damdawiin a ward hrang hrang,Operation theatre, khawl chi hrang hrang an neih te dahna, choka, bawlhlawh halna, TB damdawi pangai aia sang mamawh TB natna veite dahna bik hmun te leh Staff quarter te an fankual pui nghal a ni. Referral Hospital a thawk te chuan mamawh tam tak an neih zinga a rang lama neih tula an hriat te ziak in Minister hi an pe a. Heng zingah hian : Gate leh Compound hungthat,Full time a Medicine, paediatric, anaesthesia,orthopaedics leh Ayush a Specialist leh medical officer dah chungchang te,Nau neihna ward tihchangtlun,Eye specialist, Nursing staff, Pharmacist dahbelh te, Damlo zaina bungrua leh endikna khawl tihchangtlun te, computer leh internet facility, ambulance leh Staff leh damdawiin pan tur phurhna motor te chu lang sar deuh te an ni.

Hospital Staff te chuan damlo kantu leh awmpuitute thlenna leh chaw ei tur chungchang chu an harsatna lian tak leh referral hospital pan tumtu te tana thil buaithlak ber a nih thu an sawi bawk a ni.

Doctors' Seminar room a programme tawi buatsaih a thusawitu Health Minisister Pu Lal Thanzara chuan Aizawl Civil Hospital tihchangtlun na tur Rs 5 crore hi hman theih a ni tawh a. Chu mi atang chuan State Referral mamawh zual te hi chu phuruk theih a ni ang a ti a. Referral Hospital hmunah hian Medical College din a nih dawn bakah Medical Research Centre changkang tak rs 400 lakhs chuanga sak a ni dawn a ni a ti. Damlo kan tute leh damlo chhungte riahna tur leh eirawng an inbawltheihna leh eitur an lamna chungchang bik ah hian damdawiin lam thuneitu ten hma an lak mek thu a sawi a. State Referral Hospital awmna Falkawn khawchhung mi te tan damlo chhungte thlenna tur khualbuk man tlawm sa thei se sumhmuhna bakah thil tangkai tak leh midang te tana malsawmna a nih a rin thu a sawi a ni. Medical College din a nih hunah khawchhung mi te tan hnathawhtur tam tak a awm dawn bakah Falkawn khua tan ei leh bar leh sum hai luhna kawng zau tak a in hawng dawn a ni a ti.

Programme kaihruaitu Parliamentary Secretary Pu K.S.Thanga, bialtu MLA ni bawk chuan, State Referral Hospital te District TB Hospital te bakah Medical College nakin lawkah dintur te chu Aizawl chhimphei bial chhungtan tan chauh nilo, Mizoram tan hmasawnna lian tak a ni a ti a. Khawchhung mipui te pawh inhawng zau turte, mikhual duat thiam tur leh hnamdang zirlai lo la awm tur te pawh zawl dawh taka lo dawngsawng turin a chah a. Civil hospital tawt ta lutuk mai chua luhai thlaka, inzai ngai ten thla 2 chuang lai te an nghah ngai thin hi State Referral Hospital tihchang tlun thuai anih chuan a reh dawn a ni a ti.

Pricipal Director Dr.K.Lalropari pawhin khawchhung mi te leh khawtlang hruaitute chu damdawiin huam chhungte vawnhim leh humhalh kawnga puih turin a sawm a. TB Hospital suan luh a nih chungchangah hlauhthawn tur engmah hlauhawm a awm lova. TB natna vei te hi TB damdawi an ei phawtchuan midang tana hlauhawm an ni lo hrim hrim a ni a ti a. Thusawitu dang Health Director Dr.Lalbiakkima paw'n bawlhhlawh halna chu enghelh tur leh hlauhthawn awm anih loh zia khawtual miten hria se a duh thu a sawi a. Bawlhhlawh halna hi Euro- II certified thlap a ni a, a khu chhuak pawh mihring tana hlauhawmlo,motor changkang ber ber ten petrol kang khu an tih chhuah aiin a hlauhawm bik lo a ni a ti. Medical education enkawltu Dr.Lalbiakkima chuan nakum hian Medical College hi first batch ah zirlai 100 admission pe a kal tan tir tumin sawrkar in chak takin hma a la a ni a ti.