Vawiin chawhnu khan Health Minister Pu Lal Thanzara leh Central YMA hruaitute a pisa-ah inkawmna hun a nei a. Mumal zawka damdawi zawrh a nih theih nan meeting hi neih a ni.

YMA hruaitute chuan damdawi dawrte chu sumdawnna pangngai anga kalpui an nih thin thu leh damdawi dawr nghak tute pawhin an damdawi hralhte an hre chiang lova, hemi lama mi thiamin damdawi dawr nghak se an tih thu Minister hnenah chuan an thlen a. Hei hian kawng tam takah zirlai naupang thlengin damdawi hmang sual a tihtlem tur thu an tarlang a. Damdawi dawr license neitu dik takin dawr hawng lova mi hrang hrangin an hawh chhawng nasa lutuk tih ziaawm a nih theih nan tan lak a ngaih thu leh  license pek a nih hnua license hman dan dik taka hman a ni nge nilo enzui turin Drugs Inspector-te an phut thu an sawi bawk a. Health Minister chuan license endik kawngah theihtawp chhuah a nih tur thu a sawi a. An thu thlen bawhzuina atan Central YMA hruaitute, Drugs Inspector-te leh Mizoram Chemist & Druggist Association hruaitute nen inkawmna hun ruahman a nih tur thu a sawi a. Central YMA hmalaknate theihtawpa thlawp  a tum thu a sawi bawk a ni.