No.3848/2021-2022

Aizawl, 29^th January, 2022 : Sawrkar Laipuia Ministry of Science & Technology in Mizoram tana a thlawna an pek Mobile I-Lab (Infectious Disease Diagnostic Laboratory) chu vawiin khan Health Minister Dr R. Lalthangliana leh Health & Family Welfare Board Vice-Chairman Dr ZR Thiamsanga ten a awm lailawkna hmun Lengpui CHC ah an tlawh a, Dr H. Lalchungnunga Director, DHS leh Dr Pachuau Lalmalsawma, SNO, IDSP bakah ZMC-a Microbiologist ten tawiawmin, thuthar thehdarhtute leh Lengpui VLTF te pawh an tel a ni.

Health Minister Dr R. Lalthangliana chuan he hunah hian mobile I-Lab, RT-PCR sample test theihna khawl hi January ni 20, 2022 khan Chief Minister Pu Zoramthanga leh Union Minister For Science & Technology Pu Jitendra Singh ten a ruala an hawn tawh thu sawiin, hmarchhak State zinga a dawng hmasa ber leh a dawng awmchhun kan ni, a ti a. Manipurah mobile- I-lab hi a awm ve thu sawiin, chu erawhchu sawrkar ta ni lovin, private company te ta man nei a an hman hawh a ni, a ti a. A thlawn liau liau a kan dawn a ni a, Nikum November thla a neih hman kan inbeisei laiin sawrkar laipuiin Government e-Marketplace (GeM) hmanga engkim lei tawh tur a tih avangin min leisaktu Institute of Bioresources and Sustainable Development (IBSD) Imphal, Manipur ten a man pek kawngah harsatna an tawk deuh a, tawngka leh lehkha te pawhin kan umzui reng a, an hun tiamah min rawn pe thei lova, January thla chawhnu lamah kan dawng hman tawk a ni, a ti. A nihna ang taka hmang tan turin mobile I-lab rawn thlengah hian khawl mamawh a la kim lo deuh a, hengte hi lei turin hma kan la mek a, reiloteah a nihna tur ang takin kan hmang thei tawhin a rinawm a ni, a ti bawk.

Dr R. Lalthangliana chuan ZMC ah RT-PCR khawl pariat kan nei a, Lungleiah pakhat kan nei tawh bawk a, Champhaiah dah turin kan inruahman mek a, RT-PCR khawl pawh Champhaiah a awm tawh a, khawlin a ken tel bungraw hrang hrangte pawh kan lakhawm mek a, khawl bunna tur sak hna pawh kan thawk tan tawh a ni,a ti. Health Minister hian lengpui VLTF te hnenah COVID-19 dona hmanraw chi hrang hrang a hlan nghal a ni.

Health & Family Welfare Board Vice-Chairman Dr ZR Thiamsanga pawhin Chief Minister Pu Zoramthanga leh Health Minister Dr R. Lalthangliana ten theihtawp chhuaha tan an khawh vanga India hmarchhaka mobile I-lab a thlawna dawng hmasa ber kan ni tih sawiin, COVID-129 hripui lengin min kiansan hnuah pawh natna chi hrang hrang zawnchhuah nan tangkai takin kan hmang chhunzawm thei dawn a ni,  a ti a. Lengpui Airport-a duty te, CHC a thawkte leh Lengpui VLTF te chu khualzin luhkapui ber hmuna awm an nih avangin an hah hle tih sawiin an inpekna a fakawm tih thu a sawi a ni. COVID-19 hri kai ZMC a nunna chan an chhinchhiah zingah thlai natna dang nei lem lote pawh tun thlengin an la awm reng a, ventilator mamawh na serious tak tak pawh an la awm reng tih a sawi a, he hripui leng hi hriatthiam a har takzet a, fimkhur taka inveng chung siin, sawi nep erawh a chi rih lo a ni, a ti bawk.

Dr Pachuau Lalmalsawma, SNO, IDSP, Official Spokesperson on COVID-19 pawhin hri kai kan pung leh ta thut chu a vanduaithklak tih sawiin, a thawktute leh frontline worker zawng zawngte, tlawmngai pawlte nen theihtawp chhuaha tan kan la chunga hri kai kan pung zel mai hi a manganthlak a, a nihphung leh a inven dante kan hre vek tawh a, tunah chuan mipuitev hi kan harhchhuah a kan fimkhur tlan a ngai takzet a ni, a ti a. kar hnih chhung vel mitin hian COVID Appropriate Behaviour ukluk takin zawm theuh ila chuan hri leng hi a reh duak thei tih sawiin mitinte fimkhur turin a chah a ni.

Dr Gracy Laldinmawii, Asst. Professor, Department of Microbiology, ZMC chuan April ni 7, 2020 atanga RT-PCR sample an test tan thu sawiin, test a tam poh leh a hautak zia a lang zel a, test kit mai bakah a ken tel ngai re-agents leh thil dangte hi a hautak em em a, sawrkarin chatlak lova sample test a nih theihnana hma min lak sak thin hi kan lawm takzet a ni, a ti a. mobile I-lab chu laboratory building nen khaikhin chi a nih loh avangin a danglam deuh a, a thawktu turte pawh uluk lehzuala training pek an ngai dawn a ni, a ti a. mobile I-lab chu rawn thleng mahse a rawn ken tel loh, hnathawhna atana tul si khawl chi li vel a la awm a, hengte hi kan ngaihtuah mek a ni, a ti bawk.

Mizoram sawrkar leh Institute of Bioresources and Sustainable Development ten inremna an ziah angin mobile I-lab a hamn tur mamawh chi hrang hrangte leh thawktu Senior laboratory technician, Data Entry Operator leh Driver pakhat theuh hlawh hi kum khat chhung a tum ang a, hemi hnu hian Mizoram sawrkarin senso zawng zawng hi a tum chhunzawm tawh dawn a ni.

Mobile I-lab hi cheng nuai 105 man a ni a, sample test hna thawk tur laboratory technician te hi karleh hian ZMC ah training pek an ni dawn a, lirthei regidtration buaipui mek niin, National Accreditation Board for Testing and Calibration Laboratories (NABL) hnenah hman phalna license dil mek a ni bawk.

Health Department hotute chuan mobile I-lab chu a len bakah a sang deuh a, thingtl;ang hmun kilkhawr ber berah te kal theihlohna a nei a nih chuan a kal theih chin tawp berah inhungin mipuite pan theih turin an inchhawp hnai thin dawn tih an sawi a, mobile I-lab siamtu AMTZ (Andhra Pradesh MedTech Zone Ltd., Vishakapatnam) chuan nikhatah sample 50 vel test theih a nih tur thu an lo sawi tawh bawk a ni.