No.3849/2021-2022

Aizawl Pawlkut thla ni 29, 2022: Mizoram Journalists' Association (MJA), Lawngtlai District chuan nimin khan Lawngtlai Press Club-ah annual conference an hmang a. Lawngtlai West Bialtu MLA Pu C. Ngunlianchunga chu khuallian niin, MJA General Headquarters President Pu Zonunsanga Khiangte chu khual zahawm a ni.

Chawhma lamah rorel leh hruaitu thlanna hun hman a ni a. Chawhnu hun District MJA Vice President Pu Elvis Lalthangzuala kaihhruaiah khuallian Pu C. Ngunlianchunga chuan District MJA te duhsakna thu leh fuihna thu sawiin, Lawngtlai District MJA member-te chu sawrkar khalh ngilna kawnga sulsutu leh mipui hnena thu dik kawhhmuhtu nih tum zel turin a chah a. District MJA Pension Fund-a hman atan Rs 20,000/- (cheng sing hnih) a hlan nghal bawk.

Chawhnu hunah hian The Salvation Army Lawngtlai bial Commanding Officer Capt. George Lalramnghaka'n hunserh hmangin, khual zahawm, MJA General Headquarters President Pu Zonunsanga Khiangte leh District MJA President Pu Lalngheta Ralte te hnen atangin thu sawi ngaihthlak a ni a. District MJA General Secretary Pu Lalchharliana hnen atangin kum 2021-22 (kum khat) chhunga District MJA te chetna leh hma lakna report ngaihthlak a nih bakah, District MJA Patron, Lawngtlai Bawrhsap Dr Andrew H. Vanlaldika leh Lai Autonomous District Council-a I&PR changtu Executive Member Pu Lalropuia Chinzah te'n District MJA annual conference chibai bukna lehkha an thawn chu chhiar chhuah a ni bawk.

He hunah hian kum 2022-2024 chhung atana MJA Lawngtlai District hruaitu tura thlante chu Returning Officer, Lawngtlai District Information & Public Relations Officer Pu C. Lalhruaitluanga chuan thlan tlin an nih thu hriattirin, District MJA hruaitu thar an ni tih a puang a ni. Kum 2022-2024 chhung atana MJA Lawngtlai District hruaitu turte chu he'ngte hi an ni:

President: Pu Lalngheta Ralte, Editor, The Lawngtlai Post

Vice President: Pu Elvis Lalthangzuala, Editor, Rauthla

Treasurer: Pu H. Lalrinmawia, Editor, Rameng

MJA annual conference hi LADC-a MDC Pu C. Lalmuanthanga, LADC-a IPRO Pu HC Vanlalruatpuia, MJA General Headquarters Treasurer Pu C. Lalhmachhuana leh Finance Secretary Pu Joseph Lalnuntluanga te bakah, sawrkar official thenkhat leh LaiDCC hruaitu thenkhatte'n an hmanpui bawk a ni.