Vawiin khan Health Minister Pu Lal Thanzara leh Indo Global Health Consortium (IGHC) aiawh pali te chuan a office-ah inkawmna neiin Mizoram Institute of Medical Education & Research (MIMER) din tur chungchangah kawng hrang hranga thawhhona awm thei leh hriselna kawnga Mizoramin hma a sawn thei nana kawng hrang hranga puih leh thawhho theih dan turte an sawiho a ni.

Health Minister Pu Lal Thanzara chuan Mizorama Medical College din tur chu Mizoram tan asset lian leh hlu tak, hmasawnna atana thil pawimawh tak anih dawn mai bakah hriselna kawnga Mizoramin rahbi thar a kaina turte anih dawn avangin chak taka hmalak mek a nih thu te a hrilh a. Hemi kawnga thawhpui tha leh rintlak te chu Sawrkar pawhin thawhpui a duh thu sawiin hemi atan IGHC inhuamna leh tun thlenga Health Department hotulu leh aiawhte nena an indawrna leh an inbiakna te chu lawmawm a tih thu hrilhin thawhhona tha tak an neih ngei a beisei thu a sawi.

Hemi atana thil tul leh bawhzui ngaite chu chak takin kalpui nise a ti a. Hmun hla leh kilkhawra awm te pawhin hriselna lama inenkawlna tha an neih leh an hmuh chu sawrkar ngaihpawimawh berte zinga mi anih thu hrilhin hemi atana IGHC in kawng hrang hranga hma an lak theihna atan thawhhona duan tur pawh chak taka bawhzui nise a ti bawk. Cancer hmuhchhuahna , enkawlna leh a chhui zui zelna kawnga IGHC in sawrkar an puih theihna IGHC-in an rawn tarlan te chu tha tiin hemi kawngah pawh hian thawhhona tha tak a awm theih nan a tul ang te chu bawhzui nise a ti a ni.

IGHC aiawh te hi Pu Sridhar, Pu Arun, Pu Ramesh Gupta leh Pu D. Dewan te an ni a. Meeting ah hian Health Commissioner leh Secretary ni bawk Pu Lalrinliana Fanai leh Health & Family Welfare Department-a hotulu dangte leh officer te an tel bawk a ni.