No.3710/2021-2022

Aizawl, 18th January, 2022 : Vawiin khan Health Minister Dr R. Lalthangliana hovin Indian Medical Association (IMA) hotuten a pisa ah Mizoram thingtlang khaw hrang hranga COVID-19 hripui darh nasa mek chungchangah IMA ten hma an lak dan tur an sawiho.

Health Minister Dr R. Lalthangliana chuan IMA member ten COVID-19 hripui leng dona kawng hma an lo lak tawhna ropui a tih thu sawiin, COVID-19 hri kaite, a bik takin indaih lo tak chung pawha CCC, CCCC leh Home Isolation a awmte bial insema chhun zan zawma an vil thinna ah lawmthu a sawi a, an sum leh paite an sen nasat zia a hriatpui thu sawi langin, pension tawhte thlenga Mizoram mipuite hripui laka enkawl dam tura an rawn pen chhuak thin chu an fakawm takzet tih a sawi a ni.

Dr Thangtea chuan daktawr indaih lohna a nasat thu sawiin pension mek leh pension tur hnai engemawzat an awm bakah daktawr tang lai thiam tak tak mi 6 lai zirna sang zawk (PG) zir tura an kal a ngai a, Mizoram tana tangkai tur an la nih si avangin kan in ui hleithei si lova, kan dinhmun en hian kan tan tlan a ngai takzet a, hetiang huna IMA te in lo awm hi kan thla a muang thin a ni, a ti.

IMA hotute chuan COVID-19 hri kai dinhmun an lo zirchian dante an sawi lang a, kum kalta khan Mizorama. COVID-19 hri kai zinga 70% chu AMC area a cheng an nih laiin tunah chuan 70% hi AMC area pawna mi an ni tawh thung a, ZMC report atanga a lan danin kum kalta October thla a ZMC-a COVID-19 hri kai nunna chan zinga 30% aia tlem hi AMC area pawn an ni a, November thla a nunna chan zingah 34% AMC area pawn niin, December thlaah chuan 66% an ni a, January thla kal lai mekah hian 52% an ni tawh a. ZMC ni lo, DCHC leh Home Isolation a nunna chan zingah pawh Aizawl pawn lam an tam zawk tawh hle a ni. Nunna chan zinga a tam zawk hi kum 60 chunglam an ni bawk. Tun dinhmunah khawpui, a bikin District Headquarters te an dinhmun a tha tawh zawkin thingtlang khaw hrang hrangah a darh nasa ta hle a, hei vang hian ngaihtuahna pawh uluk taka sen a ngai a ni, an ti.

IMA hruaitute chuan a hma a an vil loh, thingtlang lamah COVID-19 positive an pun nasat takah chuan an ngaihtuahna pawh an seng nasa tih an sawi a, daktawr leh nurse awm lohna hmunahte a darh nasat avangin Aizawl atanga IMA member ten hri kaite an vil dan turte pawh an sawiho thin tih an sawi a, a hmunah kal chilh thei lo mahse internet leh social media kaltlanga in vil dan tur ruahmanna mumal siam a tul tih an sawi a ni.

Thingtlang lama hri kaite chu hlauhthawn vanga damdawi an hriat ang ang ei lo tura an duh thu an sawi lang a, COVID Appropriate Behaviour - a bikin hmai tuamna vuah that a pawimawh hle a ni tih sawi lang lehin zawm that a tul hle tih an sawi a, thingtlanga kum upate vil uluk a ngaih thu leh a tul chuan Health Worker leh ASHA te fehchhuaka kum upa leh natna benvawn neite zawng chhuak tur leh, Health Worker leh ASHA awm lohna hmunah chuan zirtirtute leh Anganwadi workers te chhawr tangkai dan zawn ni se an ti a. Hri kaite enkawl dan tur awlsam zawka hriatthiam theih tur ruahman a, khaw tinah inzirtir ni se an duh thu an sawi a, hri kai zinga ngaihtuahawmte hmunpui lama rang taka thawn zung zung thei tura ruahmanna felfai tak siam a tul thu an sawi bawk a ni.