Bangalore a cham mek Mizoram atanga Chief Minister in a tirh, Pu Lalrinliana Sailo, Health Minister leh Pu John Siamkunga, MLA te chuan August 20 zan khan Karnataka Chief Minister Jagdish Shettar chu a pisa-ah an hmu tih anmahni tawiawmtu Pu Vanlalrema Vantawl, Vice President, MJA Aizawl Hqrs. chuan a thu rawn thawnah a sawi a. Bangalore Mizo mipuite'n harsatna an tawh chungchang te Chief Minister chu sawipuiin, Karnataka sorkarin theihtawp a chhuah avangin lawmthu an sawi a. Boruak chuan muanawm lam pan zel mahse Mizo mipui rilruah hlauhna a la len em avangin hnathawh tur a la tam thu Pu Rina Sailo chuan Chief Minister hnenah hian a thlen a; Chief Minister chuan theihtawp an chhuah tur thu a sawi a bawk a ni. Hei bakah hian Dy. CM leh Home Minister R. Ashoka te an hmu leh bawk a, ani chuan Hmarchhak mite chu Bangalore a kir tura a ngen thu Mizoram MLA 2 te chu a hrilh bawk a. Pu Lalrinliana Sailo te pahnih ngenna angin a tul a nih chuan sawm let turin hmarchhakah pawh zin a inhuam thu a sawi a ni.

'Kan mipuite in lo thlamuan avangin kan lawm takzeta, mahse an rilru ah hian hlauhna (fear and insecurity) a la awm avangin kan hmaah hian bawhzui tur (task) tam tak a la awm a ni' tiin Minister Pu Lalrinliana chuan Chief Minister hnenah hian a sawi a, CM Shettar chuan theihtawp an chhuah zel tur thu leh tha an thlah loh tur thu a sawi bawk a ni. Pu Rina hian CM hnenah hian North East Minister te chuan Centre din tha an tih thu a sawi bakah chumi atan chuan Bangalore-ah ram pe turin a dil bawka, CM chuan tha a tih thu leh bawhzui a nih tur thu a sawi bawk a ni.

Karnataka Education Minister chuan zirlai haw te chu lo kir vat turin a chah bawk a, University/College lam pawhin attendance ah ngaihhnathiamna an pek tur thu MLA 2 te chu a hrilh a ni.

Bangalore boruak hian muanawn a pan chho zel a, SMS a invauna thawn darhin hun tiam a pek, August ni 20, 2 PM hnu lamah pawh complaint a lut lem lo niin DGP Lalrokhuma Pachuau chuan a sawi a, boruak muanawm tak a awm hrih niin a sawi bawk a ni. 'Theihtawp kan chhuah zel a, ni 5 chhung chu tha thlah hauh lohin kan invil reng dawn a, hemi hnu hian boruak thlirin kan chet lak dan tur kan rel zel ang' a ti a, case register tawh 17 a nih thu leh mi 22 man an ni tawh thu a sawi bawk.

DGP leh Mizo hruaitute chu naktuk August ni 22 tlai hian chibing inthliarna do pawl Rainbow Forum chuan Samad House ah remna chawhlui 'Iftar' kilpuiah an sawm a, sakhua leh hnam chi hrang hrang hruaitute 1,000 pungkhawmin Mizo aiawhin Bangalore Mizo hruaitute pawh thusawi tura tih an ni bawk a, Karnataka Governor Shri Hans Raj Bhardwaj chu Khuallian tura beisei a ni bawk. 'Muslim hruaitute hian min ngaihsak em em a, Bangalore a tlawmngai pawlte pawhin theihtawp an chhuah a, an chungah pawh kan lawm hle a ni' tiin Bangalore Mizo  Association hruaitute chuan an sawi a ni.

Bangalore media lam chuan Hmarchhak Minister Bangalore a 'Goodwill Mission' a kal te an umzui nasa hle a, Mizoram MLA tawngkam te pawh an chhuah hlawm a ni.

Boruakin a zir a nih chuan Pu Lalrinliana Sailo leh Pu John Siamkunga te hian ni 24 hian Mizoram lokir leh tura beisei an ni.