Bangalore-a Hmarchhak inthliarna avanga Mizote thlamuan tura cham mek Pu Lalrinliana Sailo leh Pu John Siamkunga te chuan August ni 20 zing dar 10 khan Mizoram House, Bangalore-ah Bangalore a Mizo hruaitute kawmin an mamawh te an ngaithlaksak a. Hmun fal deuha mahnia awm ngam lote tan ruahmanna ruatsakin House-a dahkhawm lailawk an nih theih nan motor 3 hire remtih a ni a, an awm chhung ei leh in pawh sawrkarin a tumsak hrih dawn a ni. Intawhkhawmna neih a nih zawh hian Pu Lalrinliana Sailo chuan Chief Minister Lal Thanhawla be nghalin Chief Minister chuan Bangalore Mizo mipuite thlamuan tura kal an nih angin an mamawh ang chu tihsak turin a remtihna a pe nghal bawk a ni.

Pu Lalrinliana chuan an kal chhan sawiin 'thlamuan tura lokal leh inkawm hnua hmalak zel dan tur sawi ho tura Chief Minister in min tirh kan ni a, sawrkar chuan a theih tawp a chhuah dawn a ni' tiin thuchah a sawi a. 'Karnataka sawrkar in che tura a tih tura a tih DGP Lalrokhuma Pachuau a lo awm hlauh chu a phenna malsawmna a ni' tiin a sawi a. Hemi hnu hian Bangalore a hostel leh college theih ang ang tlawh kualin Mizote thlamuang turin leh sawrkarin theihtawp a chhuah thu a sawi bawk a ni. Zirlaite chuan MLA 2 kalte chu an thla a muan phah thute an sawi bawk a ni.

Ni 20 zing vek khan an thlenna Karnataka State Guest House ah Pu Lalrinliana Sailo chuan Sikkim Speaker leh Nagaland Power Minister-te a pindan ah lenga sawmin inkawmna an nei a. State dang minister te nen inthurualin Hmarchhak Minister inhmukhawmte chuan Bangalore-ah North East Meeting Centre din rawt an tum bawk a. Mizoram Health Minister hian nimin lam hian Karnataka Chief Minister a hmuh beisei a ni.

DGP Pu Lalrokhuma chuan thil thlen dan leh venhimna lam sawifiahin Case 15 lutah mi 20 man an ni tawh thu a sawi a, Hmarchhak mite chuan FIR thehluh ai chuan hmun him mai pan an duh avangin hnathawh a ti harsa niin a sawi a, nunna chan an awm loh thu a sawi bawk. 'Central atangin RAF 180 tirh luh an nih tawh bakah Police 22,000 lai chu Bangalore ah patrolling tih tir an ni a, police te vil ngai bik nia an hriat te chu an vil ngawrh bik a ni' a ti bawk. Ni 19 zan khan Karnataka Home Minister nen tlaivara patrolling an vil thu a sawichhuak a ni.

DGP chuan 'Hmarchhak lam hian SMS leh MMS an dawng tih hi August ni 14 khan kan hre tan a, ni 15-ah railway lamin Guwahati ticket book a tam uchuak thu min hrilh bawk a.Vauna SMS-ah chuan 'August ni 20, tlai dar 2 PM hmain Bangalore in chhuahsan loh chuan in nunna in a tuar ang' tihte a ni hlawm a. SMS hmang hian Hmarchhak mite chu a tithlabar hle a, hmun hnih thumah tawngkam leh tharum thawh tumna nia hriatte a thleng tih sawi a awm a, ziaka complaint a luh si loh avangin chet lak a har thu a sawi bawk a. 'Ni 17 khan Winson Garden, Big Bazaar bulah Hmarchhak mi pakhat chu tlangval 4 in an khawih rawn avangin FIR a lut taa, hliam na a tuar loa; hei hi kan tan chuan hnuchhui theih fumfe kan neih hmasak a ni' tiin a sawi a. A titute chu man an ni a, an thiante dang 2 man belh niin mi 4 chu Muslim an ni a, pakhat chu Hindu a ni a, pakhat dang leh chu Kristian a ni a.He mite zing ami handset atang invauna hian SMS hmuh a nih thu sawiin 'Hemi hnu hian Koromangla an dawr pakhat atangin computer 1, lapttop 1 leh mobile handset 4 man a ni a, heng bungruate hi invauna SMS leh MMS thanchhuah nan an hmang ngei tih police te chuan an finfiah a. Intelligence Bureau kan hlan zui ta a, tunah hian chhui zui mek zel an ni' tiin a sawi bawk.

Bangalore Mizo Association President Lalrinpuii chuan Mizoram sawrkarin a ngaihsak vat avangin lawmthu a sawi a. Ni 2/3 kalta chhung kha chuan invauna emaw complaint a dawn meuh loh thu sawiin boruak chuan muanawm lam a pan zel a beisei thu a sawi bawk a ni.

August ni 20 chhun atang khan Mizoram sawrkarin motor a hire hmang hian a duhte chu Mizoram House lamah phurh khawm an ni a, nimin tlai thleng khan 30 vel an awm tawh a ni.

MLA 2 zinte hi 21 August tlai dar 5 hian Juma Kasjid Trust Board chuan Id-ul-Fitur denchhenna inremna chawhlui kilpui turin an sawm bawk a ni. Hmarchhak State dangte pawh chawhlui an lo kilpui tawh bawk a ni.