Parliamentary Secretary Pu Lal Thanzara chuan vawiin khan Shillong Laitumkhraha Donbosco Technical Hall-ah 33rd Annual Freshers’ Social, Mizo Students Union (MSU) buatsaih a hmanpui.

Pu Lal Thanzara chuan Shillong Mizo zirlaite chu hnamdang zinga awm an nih avangin awmdan mawi ngai pawimawh thin turin a chah a. Lehkha zir tura awm an ni tih hre reng tura chah bawkin, khawi hmunah pawh midang ruala hna thawk  thei tura thiamna zirchhuak ngei turin zirlaite chu a fuih a. Tunlai ah zirna leh zirna hmun te tunhma zawng aia a that tawh zawk laia, central service lama Mizo kan lang pha tlem tial tial hian thalai te inenfiah a, tan la turin a chah a ni.

Pu Lal Thanzara chuan literacy sang ringawt hian thiamna a kawklo a ni a ti a. Thiamna chherchhuak thei, zirna in sang zawk, NIT te, IIMC te leh a dangte Mizoramah ngei Mizoram sorkar hmalaknain kan nei tawh a ni a ti a. Zirlai hruaitu thenkhatin zirlaite hmakhua ngaithaha politics lama an thil tumte tihpuitlin nana zirlaite an hmang thin hi a vanduaithlak a ni tiin, kan ram chhunga vai sumdawngte leh supplier te hnena pawisa an khawn thin bawk hi a vanduaithlak hle a ni a ti. Sorkar sawisel ngawr ngawr ringawt ai hian a tha zawnga inhrilhhriate hikantihtur a ni a ti.

Pu Lalthanzara chuan zirlaite chu beiseina sang tak nen kan lo thlir che u a ni tiin, an zirnaa beidawng mailo turin a duhsakna a hlan a. Shillonga an awm chhunga an chezia te, an hlawhtlinna te chu an mahni tan chauh nilo, Mizo zawng zawng hlimthla a ni tih hre reng turin a chah a ni.

Freshers’ Socialah hian zirlai an kal tha hle a. Khualzahawm ah Pu B.Laltanpuia, Director, State Resource, NEHU a ni a. MSU President C.Lalbiakkima’n presidential address a sawi a, Secretary R.Lalmuanpuia’n lawmna thu a sawi bawk a ni. Parliamentary Secretary Pu Lal Thanzara hi a nupui Pi Zoteii’n a tawiawm a ni.