Nimin khan Chief Minister Conference hall ah Health Minister Pu Lal Thanzara leh Rajya Sabha MP Pu Ronald Sapa Tlau te hovin Cancer enkawlna hmunpui din dan tur sawi ho a ni. Hetah hian Health & Family Welfare Department Commisisoner, Pu Lalrinliana Fanai leh a thawhpui dangte; Principal Adviser to CM Pu R.L. Rinawma; Health & Family Welfare Department Principal Director; Director, Directorate of Health Services; Director, Directorate of Hospital & Medical Education leh Mizoram State Cancer Institute a mithiamte leh he project beisei mek atana ruahman buaipui tura lokal Public Health Foundation of India mithiamte – Prof. Subhash Hira, Dr. Thomas Samuel Ram, Dr. Preet Dhillion, Dr. Priscilla C Ngaite, Pu Sanjay Sood leh Pi Arshi Munwara te chu an thukhawm a ni. Japan International Coperation Agency (JICA) tanpuina dawn tur beisei mek hmanga Mizorama Cancer inenkawlna hmunpui, a thar din thei dan emaw, Mizoramin cancer inenkawlna a neih mek MSCI nena he project kalkawp thei dan kawng emaw, awm thei te zau taka sawiho a ni.
Health Minister Pu Lal Thanzara chuan Cancer hrang hrangin Mizoram mipui a run mek dan te leh Cancer inenkawlna atan Mizoram Sawrkar chuan a thei anga hma lain MSCI a din thu te, inenkawlna man sang te pawh theih ang angin a tihniam dan kawng te dapin an zawng mek a. Chuti chungin cancer inenkawlna atan Sawrkar, State economy ang leh mimal ang pawha sum hman te chhutin, a san hle thu a sawi a. PFHI aiawhte chu lo lawmin cancer chungchanga Mizoram dil tur JICA project hmachhawp hi hmuh ngei a nih theih nan PFHI mithiamte chu Mizoram Sawrkar theihtawp chhuahpui turin a sawm nghal. He project atana ngaituahna senga JICA te a tir atanga lo dawr tu Pu Ronald Sapa Tlau chungah lawmthu a sawi bawk a ni.
Rajya Sabha MP Pu Ronald Sapa Tlau chuan he project JICA a sawipui dan te sawi chhovin he cancer inenkawlna hmunpui beisei mek hi Mizoram mai nilovin Hmarchhak state dangte bakah ram thenawm te pawhin an chhawr thei dawn ani tiin JICA lam pawh he project fund turah an phur viau tih a sawi.
Meeting ah hian PFHI aiawh te leh mithiam lokal te hian an ngaihdan leh he project an lo mithla dan te sawi hovin, Health Department doctor te pawhin cancer inenkawlna Mizoramin a neih te, an mamawh leh an hmachhawp te an sawi a. He project thar ruahman tur hi amah in a hranga din nge tha ang tih te, MSCI nena kalkawp tir thei dan kawng a awm thei em tih te, awmta se engtia kalpui tur nge tih leh chu chu JICA lamin rem an ti thei em tih te chu sawiho a ni a. Meeting hi a vawikhatna anih avangin thutlukna siam a la ni lova. PFHI te hian he project hi loan ang ni lo grant ang zawnga dilpui an tum thu an sawi bawk.
Mithiam te hian vawiin atanga an cham chhung Friday thleng Mizoramin Cancer infrastructure leh cancer mithiamte leh hmanraw neih te a hmunah enin chanchin kimchang an zir dawn a, Health Department te nen meeting neiin proposal ruangam tur an duang dawn bawk a ni.
He ruahmanna chungchang hi Pu Ronald Sapa Tlau in JICA leh PFHI te lo dawrin, hma a lo la tawh a, chumi hnu chuan JICA hnenah Health Minister in Mizoramin Cancer inenkawlna a mamawh dan te ziakin a thawn a, JICA lamin he thil hi an ngaihtuah vat theih nan proposal leh DPR te thehlut turin Mizoram Sawrkar an hrilh a. Chumi ang chuan India ramah hriselna lama thawk mek pawl lian tak leh changtlung tak, hriselna kawnga mellung pawimawh tak tak lo phun tawh leh sulhnu ngah tak Public Health Foundation of India (PFHI) hi proposal leh a tul ang angte buaipui leh thurawn pe tura sawm a ni.
PFHI team mithiam 6 te hi Aizawl ah ni 3 an cham dawn a, an cham chhung hian Department hotu pawimawh leh mithiamte nen Mizorama Cancer inenkawlna changtlung tak din a ni thei dante sawiho leh zir in, proposal leh DPR te JICA hnenah thehluh turin an buatsaih dawn bawk a ni.
