No.2925/2021-2022
Aizawl, 9th November, 2021 : Health Minister Dr R. Lalthangliana’n vawiin khan SAD Conference Hall-ah Zoram Medical College (ZMC) a Academic Department hrang hranga thawk faculty member te a kawm a, he hunah hian Health Secretary Pu R. Lalramnghaka, ZMC Director Dr John Zohmingthanga leh ZMC Registrar Dr Jane R. Ralte an tel bawk a ni.

Health Minister chuan ZMC chu kum 3 leka upa nimahse hma a sawn chak em em a, thil dang zawng aiin thiamna lama thangchhuah (academic excellence) an ngaih pawimawh ber a tul a ti a, hemi atana mamawhte pawh a theih ang angin an ngaihtuah zel dawn tih a sawi a ni. Kum 2 a ral meuh chuan ZMC a zirlai first batch te an zir zo tawh dawn a, daktawr tha leh rintlak, thiam tak an chherchhuah ngei a beisei thu a sawi a, theihtawpchhuaha an thiamna leh theihnate chu an zirlaite tan sawr chhuak tura tan la zel turin a chah a ni.

ZMC zirtirtute chuan COVID-19 hripui leng karah p[awh an theihtawp an chhuah reng tih an sawi a, India ram hmun dang aia hripui leng vawrtawp (peak) kan thlen har avangin duh angin hma an la chak thei lo erawh a pawi an tih thu sawiin, hrileng dinhmun a ziaawm hret hret zel an beisei thu leh a nih tur anga class kal mumal theih an nghakhlel tih an sawi, an zirlaite chu an chhuanawm an tih thu lleh India ram hmun danga an experience tawhna atangin zirtirtute zah thiam mkawngah leh zirlai ngaih pawimawh kawngah an fakawm hle tih an sawi a ni.

ZMC-a zirlai first batch te chuan Civil hospital, aizawl-ah leh Synod Hospital, Durtlangah clinical posting an neih mek thu sawiin, hei hi an chhawr tangkai takzet tih ans awi a, MZU nen an thawhhona a that thu leh an tangkaipui thu an sawi bawk.

ZMC-a len chhoh zel avangin an hnathawh leh OPD-a damlo inentir an pun zel bakah hmalakna a tam zel tak avangin Health Management Information system changtlung tak an mamawh tawh thu an sawi a, heng bakah hian department thenkhata thawktu indaihlohna leh mamawh hrang hrangte sawilan a ni bawk a, intuaihriam zel an mamawh thin avanga India rama Medical College changtlung zawkahte a khat tawka training neih thin a pawimawh thu an sawi bawk.

Vawiin inkawmhona hunah hian India ram hmun hrang hranga Medical collegete dinhmun thlirin ZMC tihchangtlun belh zel dan turte pawh sawiho a ni bawk a ni.