No.2926/2021-2022
Dated Serchhip, the 9th November, 2021: Vawiin hian Serchhip District Development Co-ordination & Monitoring Committee (DDCMC/DISHA) te chu an Chairman Pu C. Lalrosanga, MP, Lok Sabha hovin an thukhawm a, kum kal meka Serchhip District a Central sawrkar sum hmanga hmasawnna hnathawh hrang hrangte an thlir let.

Vawiin thutkhawmna hi Internet kaltlanga buatsaih niin Chairman hi Delhi-a a Quarters atangin meeting a rawn kaihruai a, Co- Chairman Pu K. Vanlalvena hi damlohna avangin a tel thei lova, Er. Lalrinawma, MLA, Tuikum pawhin ama Pisa atangin meeting hi rawn zawmin Serchhipa Officers leh members dang te erawh Pu Kumar Abhishek, IAS, Member Secretary leh Bawrhsap ni bawk hovin DC Meeting Hall ah thukhawm thung a ni.

Pu C. Lalrosanga chuan, Covid19 hripui avangin hun engemaw chen DISHA an thutkhawm theih tawh loh thu sawiin, December, 2020 an thutkhawm chu Serchhip District DISHA thutkhawm hnuhnung ber a ni a ti a. He thutkhawm hnu lama hmalakna hrang hrangte thlir ho chu vawiina an hna pawimawh a nih thu a tarlang hmasa a. Officer hrang hrangte inpekna leh inbuatsaihna fakin theihtawp chhuaha ram hmasawnna hnate thawk zel turin a chah a ni.

Member Secretary Pu Kumar Abhishek, IAS, Serchhip Bawrhsap pawhin thusawiin, DISHA Meeting hlawhtling tak a awm theih nana thawktute chungah lawmthu a sawi a. Chairman Pu C. Lalrosanga leh Er. Lalrinawmate chungah lawmthu sawiin, Co- Chairman Pu K. Vanlalvena pawh a dam leh thuai theih nan duhsakna a hlan a ni.

Vawiin meeting ah hian Serchhip district a Central sawrkar sum hmanga hmasawnna hnathawh hrang hrangte chu a enkawltu Officer ten report an pe a, ni za inhlawhna kalpui mekah October thla thlenga ni 71 inhlawhna pek a nih tawh thute, a bak ni 26 pawh November leh December thlaa pek tum a nih thute, bakah National Rural Livelihood Missions hnuaia hmalakna te, BADP E. Lungdar Block hmalakna kal mek te, PMGSY hnuaiah district chhunga hnathawh hrang hrang te, DDUGJY, Swachh Bharat, National Health Missions, PMMVY, Sarva Shiksha hmalakna te leh thil dangte hmalakna report ngaihthlak a ni a. Member ten zawh duh an neihte zawtin sawi hona an nei zui zel a ni.