No.2927/2021-2022
Aizawl 9th November, 2021 : Dr. K. Beichhua, Social Welfare Department, A.H & Vety, Excise & Narcotics Department leh Sericulture Department changtu Minister chuan vawiin khan Mamit-ah District Veterinary Hospital leh Satellite Boar Semen Station chu khuallian niin a hawng.

Khuallian Dr. K. Beichhua chuan Mamit mipuite lo lawmna-ah lawmthu sawiin khawvel huap hrileng avanga kan buaina chu a dawnsawn dan thiam a, kan Pathian leh kan hruaitute chunga innghat ngam a, ram hruaitute pawhin a theih chen chenah mipuite tana ngaihtuahna an sen thu a sawi. Hun eng emaw chen atanga African Swine Fever, kan ramin nasa taka kan tawrh chu pawi a tih thu sawiin Vawk chantate zawng zawng pawhin beidawng lova bultan thar lehin kan hun tawnte a dawnsawn dan thiam turin a chah a. ASF vanga Vawk chante tan zangnadawmna pek an nih theih nan hmalak mek a ni a ti bawk. Mamit District chu ramri depa awm kan nih avangin buaina tawh palh thulhah pawh inlungrual tak a, ei leh bar kan tlakchham lohna tura intodelh a, mahni ke-a ding thei tura taimakna leh tumruhna nen thahnemngai taka thawk turin a chah.

Vety Minister chuan hun khirh tak kan tawh kara District hrang hrangah Vety Hospital 7 lai sak mek zinga Mamit Vety Hospital hawn theih a ni chu lawmawm a tih thu sawiin he hun thleng thei tura thawktu Department Officials te chungah lawmthu a sawi a. Mamit Vety Office-a thawkte chu quantity aia quality ngaipawimawh tura chahin an hna a tui tur leh mipui tana an service tihtakzeta pe thin turin a chah a. Mihring leh ran hriselna chu thil inzawm tlat anih avangin ngaihpawimawh ve ve a tul a. Rampawn atanga ran natna lo lut tur kan do theih nan ran lakluh khap thin anih thu sawiin Sorkar thuawih lova ran lo la lut an awm thin chu pawi a tih thu a sawi. Mamit District mipuite chu Sorkar thuchhuak rinawm taka zawm tlat thin turin a chah a ni.

Vawiina hawn tak Vety Hospital, Mamit tan hian X-Ray, Ultrasound leh Mobile Veterinary Unit pathum pek thuai tum a nih thu Minister hian a sawi bawk.

Pu C. Lalmuanpuia, MLA, Vice Chairman, A.H & Vety and Sericulture Board pawhin thu sawiin Mamit mipuite'n an ran vulh te awlsam leh tha taka an enkawlna hmun tur Hospital hawn a ni chu lawmawm a tih thu sawiin thawktu department zawng zawng chungah lawmthu a sawi a. Kan hrileng mek Covid leh African Swine Fever pawh hi tanrualna nen kan hneh theih thu sawiin tan la sauh sauh turin a chah.

Dr. H. Laltlanmawia, Director, A.H & Vety Department chuan Technical Report pein District Veterinary Hospital hi NABARD Rural Infrastructure Fund, State Government of Mizoram, RIDF Project atanga sak niin Project Cost Rs. 90 lakh leh NABARD Loan Rs.85.05 lakh senga sak a ni a. A sak tan hna hi Ni 30.9.2019-ah tan niin Ni 31.05.2020-ah sak zawh a nih thu a tarlang. Vawiin veka hawn tak Satellite Boar Semen Station Mamit hi National Livestock Mission hnuaiah Rs. 85 lakh senga sak a ni a. Ni 20.03.2020 -ah sak tan niin Ni 12.10.2021 -ah zawhfel a ni.

He hun hi Pi Lalzarmawii, IAS, Secretary, A.H & Vety Department chuan kaihruaiin Dr. F. Vanlalruata, DAH & VO, Mamit chuan lawmthu a sawi a ni.

Minister hi A.H & Vety & Sericulture Board members te bakah Officials dangte'n an tawiawm a ni.