No.2928/2021-2022
Aizawl, 9th November, 2021: Champhai Town Planning & Development Committee chu vawiin khan an Chairman Pu T.J. Lalnuntluanga, Law & Judicial Minister hovin DC Conference Hall-ah an thukhawm. He hunah hian Champhai Master Plan 2041 buatsaih mek chungchang sawiho a ni a, rawtna leh tul dang hrang hrangte rela ngaihtuahho niin, zawhna leh chhanna hunte siam a ni a, inrawnkhawmna hun hlawkthlak tak hman a ni.

Law & Judicial Minister Pu T.J. Lalnuntluanga chuan hun rei tawh tak atanga buaipui Champhai Master Plan chu khawpui thang zel mamawh leh tul angte buaipui a, ruahmanna tha tak nei fel sa thlapa awmze neia Champhai khawpui huamchhung tana hmalakna a nih thu a sawi a. A hranpain thuneitute pawmpui phawt angaih avangin Master Plan duan mekah N.Khawbung, Ngur leh Mualkawi te a tel ve tak loh thu a sawi a. Master Plan siam kaltlangin sum leh pai awm sa vek hmanga hmasawnna ruhrel thawh nghal char char tur tihna a nih loh thu sawiin, Champhai Master Plan chu hmathlir thui tak neia duan, harsatna awm lova hmun ruat lawk ang thlapah hmasawnna kalpui nghal a nih theihna tura duan lawkna chauh a ni tih hre tel turin mipuite a chah a. Nakin zelah pawh Committee member-te inthlakin Chairman leh thawhpui dangte pawh inthlak hun la awm thei a nih vangin lo inruahman lawk a, thawktu dangte tan pawha awlsam tur ngaihtuah chunga Champhai tana tha ber tur tinzawna siam a nih thu a sawi bawk.

Champhai Town Planning & Development Committee Chairman chuan sawi chhunzawmin, hripui avang leh hmalak dan indawt a thui avangin duh anga hmalak chak a ni thei lo chu pawi a tih thu sawiin, inrawnkhawmna leh rawtnate siam fel a nih hnuah tun thla November ni 17, 2021 hian Master Plan duan chhin ‘Draft Champhai Master Plan 2041’ chu peihfela, a duh apiangte tana en theih turin DC Office leh DUDO Office Champhaite bakah Town & Country Planning Office, UD&PA Aizawl-ah te en theiha chhawpchhuah a nih tur thu a sawi a. Mipui atanga rawtna leh thu thlen duhte a awm a nih chuan ni 30 chhung hun hawn a nih dawn thu leh Champhai Town Planning & Development Committee-in a pawm hnuah sawrkar pawmpui turin nakum January thla chhunga peihfel hman tum a nih thu a sawi bawk.

Pu T.J. Lalnuntluanga chuan kum 20 lo la awm tur hmathlir nei chunga Champhai Master Plan 2041 siam mekah kum hmasa lama lo siam tawh Champhai Master Plan 2021 leh Town Planning & Development Committee thutkhawm hmasak hmanga rawtna siamte chu nuai bo mai lovin, a awinun theihte chiang taka ennawn chung zela zehtel a nih thu a sawi a. Champhai Master Plan siam chu mumal taka hmasawnna ruhrel siam dan tur duan mai bakah hmasawnna kal zel tur endika vil tur a duan a nih thu a sawi bawk a. Champhai District mipuite chu Draft Master Plan 2041 peihfel a nih hnua chhawpchhuah a nih hunah lo zirchiang tur leh, rawtna an neihte inthlahrung hauh lova thuneitute hnena thlen hreh lo turin a sawm a ni.

Champhai District Bawrhsap Pi Maria C.T Zuali, Vice Chairman, Champhai Town Planning & Development Committee chuan kalkhawmte lawmna thu a sawi a. Boruak nuam, sik leh sa tha leh District mawi tak Champhai ti changtlung tura Master Plan puahchah mek chu khawpui thangzel tur thlir chunga thil tih makmawh tak a ni, a ti a. Theihna sang tak nei District a nih angin thuam thata cheibawl kawnga Master Plan Champhai Chairman, Law & Judicial Minister ni bawk Pu T.J. Lalnuntluanga thahnemngaihna fakawm a tih thu sawiin, nakin zela thangtharte dem hlawh loh nan inrawntawna Champhai tana tha ber tur ngaihtuah a tul a ni, a ti a. Champhai hmellanna leh hmingthatna leilet phaizawl humhalh kawngah theihtawp chhuah mek zel a nih thu sawiin, khawtlang hruaitu leh District mipuite chu thawhhopuiah a sawm a ni.

Thusawitu dang Pu Ralthuama Ralte, Deputy Director of Town Planning (UD&PA) & Member Secretary, Champhai Town Planning & Development Committee chuan Champhai Master Plan siam mek chu mimal hamthatna tur nilo, a mi chengte nakin zel hun ngaihtuaha siam a nih thu a sawi a. Khawpui thang chak zel chuan master plan siam kawngah harsatna a thlen theih avangin a hma thei ang bera peihfel tuma tanlak a nih thu a sawi bawk.

He hunah hian Pi R.Lalhmangaihzuali, Asst. Director, UD&PA chuan Champhai Master Plan duan chhin powerpoint presentation hmangin a sawifiah a. Master Plan hnuaiah Champhai khawpui leh Town area chhung khawper satellite town-te khairual taka kaltir tum a nih thu a sawi a. Satellite Development Formation leh Urban Decentralisation-te ngaihpawimawh a nih thu a tarlang bawk.

Vawiin meeting-ah hian Pi R.Lalnunkimi, DUDO Champhai, Champhai Town Planning & Development Committee member dangte leh sawm bikte an tel tha hle a ni.

Town & Country Planning Office, UD&PA Aizawl-in 2020 survey a neih atanga a lan dan chuan Champhai Town Area-ah mihring 43,375 vel awm anga hriat/chhut a ni a. Kum 20 hnu 2041 ah chuan mihring 64,555 awm tawh tur anga chhut a ni a. Mihring bit zawng (population density) hi Hectare 1 bial chhungah mi 72 zel cheng tur anga chhut a ni bawk. Tunhnaia Building survey neih atanga a lan danin in ding mek zinga tam zawk semi-pucca building (semi RCC leh Assam Type) chuan za zela 64 a tlingpha a, in dinglai zinga za zela 59.1 chu chhawng khata sang a ni. Champhai Master Plan 2041 hmang hian Champhai Town Area a veng/khua te chu a zau zawng, mipui tam leh bit dan a zirin Zone 12 ah then a ni a. Industrial Zone, Recreation Zone, New Residential Zone, Education Zone leh tul dang turahte then fel a ni a. Champhai Revenue Town Area Sq Km. 47.8 a nih laiin, Champhai Master Plan 2041 huam chin tur zau zawng chu Sq.Km 73.89 a ni.

Attachment

  • Loading attachment...