No.2929/2021-2022
Aizawl, November ni 9, 2021: Vawiin chawhma dar 11:00Am khan SIRD Conference Hall, Meisavaih, Siaha-ah Mizoram Youth Commission, Medhavi Foundation leh Siaha District Skill Core Committee te tangkawpa buatsaih Covid-19 pandemic vanga hmun danga inhlawh lo hawh (Returned Migrant Workers) te tana buatsaih Cake Baking Training hawnna hun hman a ni. He hun inkhawm hi Pu N. Lalzarzova, SDC, in a kaihruai.

Vawiin Returned Migrant Workers te tana buatsaih Cake Baking Training hawnna hun hi Pi Lalnunmawii, SDO(S) chuan khuallian niin a hmanpui a. Pi Lalnunmawii chuan thusawina hun hmangin, hetianga Mizoram Youth Commission ten Siaha thalai, hmun danga ei zawnga awm Covid-19 hripui avanga mahni hna kalsan a lo let te hmakhua ngaia training a buatsaih hi a ropui hle a ni, a ti. Mahni sum sen ngai lova Mizoram Youth Commission kaltlanga training neih a nih tur hi hun tha tak a ni a, he hun tha hi bawhpelh lova, hmang tangkai theuh turin Trainees te chu a chah hlawm a ni. Sawi chhunzawmin Pi Lalnunmawii chuan, Sawrkar hna chauh hi ei zawnna ngialnghet a ni lova, eng hna pawh thawk ila, Pathian malsawm tlaka kan thawhrim chuan ei hmuhlo a awm thei lova, chu chu kan ram mamawh ber pawh a ni tiin, mitin kan hmazawn theuh a taimak chhuah a, mahni tan bakah midangte tana entawn tlak leh zirtirtu nih tum theuh ang u, tiin vawiin training a tel zawng zawngte chu a chah hlawm a ni.

Pu David Lalruatfela, Commis Chef Trainer (Medhavi Foundation) pawhin training kalpui dan tur te leh hmun danga an hmalak tawhna tlangpui report pekna hun hmangin, Aizawl lam atanga a trainer puite hmelhriat tirna hunte a hmang bawk. Pi R. Lalliliparmawii, Bakery Chef nen hian vawiin atangin training hi an pe tan ang a, ni 19.11.2021 thleng an chamchilh dawn a ni. Tun hi 1st Batch training a ni a, anni zawh hian 2nd batch leh 3rd batch training pawh la kalpui leh zel tura ruahman a ni bawk.

Pu N. Lalzarzova, SDC, Siaha chuan lawmthu sawiin vawiin training hawnna hun hi a titawp a ni.