2117/2024-2025

AIZAWL; the 18th September, 2024: Vawiin chawhnu dar 1:30PM khan Health & Family Welfare Minister Pi Lalrinpuii hovin SAD Conference Hall-1, Secretariat,MINECO-ah, State Level Governing Body Meeting on Climate Change and Human Health(SLGBCCHH) member ten meeting an nei. Vawiin meeting-ah hian sik leh sa inthlak( Climate change) in mihring hriselna a nghawng dan leh chumi laka lo inven dan tur leh a tih nep(tih ziaawm) dan tur te huang zau taka sawi ho a ni.

Vawiin meeting-ah hian Health Minister Pi Rinpuii chuan meeting khuhhawnna thu sawiin, sik leh sa nasa taka inthlak avanga mihring hriselnain a tuar theih dan leh a kaihhnawih hi a nasa hle mai a. Hriselna bakah khuarel chhiatrupna kan tih tam tak pawh hi sik leh sa inthlak avanga lo thleng te pawh an ni. Sik leh sa nasa taka inthlak avanga kan tawrhna hrang hrang te hi department pakhat chauh vin a hmachhawn theih chi pawh a ni lova, department hrang hrang tanho ngaihna thil a ni. Chuvangin department tin ten inlungrualna leh thawhhona tha kan neih a ngai tak zet a. Thawhhona tha kan neih a tul zia hi in department theuhva pawh lo sawi uar theuh turin ka ngen che u, a ti.

Vawiin meeting-ah hian Minister Pi Rinpuii hian State Action Plan on Climate Change and Human Health (SAPCCHH) a tlangzarh nghal a ni.

Dr.Eric Zomawia,Member Secretary Mission Director,NHM in SLGBCCHH lo indin chho dan leh Mizoram pumpuia hmalak tawhna te report pekna hung a hmang a.

Dr. Vanlalrengpuia,State Nodal Officer,NHM chuan power point presentation hmangin, Climate Change in mihring hriselna a nghawng dan leh natna hrang hrang a thlen dan te, chumi laka lo inven dan tur leh a nghawng tih ziaawm tura hmalak dan tur National Programme on Climate Change and Human Health (NPCCHH) in a buatsaih chu a entir bawk.

Pi Sangchin Chinzah, IAS, Secretary, H&FW chuan member kalkhawm te lawmna thu sawiin, climate change hian mihringte-ah kawng tam takin hrasatna a thlen a, hriselna bikah pawh nasa takin nghawng a nei a ni. Chuvang chuan kum 2015 khan Prime Minister kaihhruaina hnuaia ‘Mission on Health’ hmalakna hnuaiah National Expert group ten NAPCCHH hi an lo duang ta a ni. NAPCCHH hi Ministry of Health and Family Welfare hnuaia kalpui niin,a programme NPCCHH hi kum 2019 khan tlangzarh a ni a.  A thil tum chu sik leh sa inthlak  in mihring hriselna nasa taka a nghawng tur ven leh tinep a ni, a ti.