2281/2026-2027

Health Minister Pi Lalrinpuii chuan vawiin khan Tuipuiral Zirlai Pawl (TZP)  Freshers’ Social, Chanmari YMA Hall-ah a hmanpui. Pu Ramthanmawia, Bialtu MLA chu Khualzahawm a ni.

Khuallian Pi Lalrinpuii chuan Tuipuiral chu Pi Pu hmun hlui tam tak awmna, Tourist hip nana hmun pawimawh - Fiara tui, Thasiama Seno Neihna, Mizo tlang hmingthang tak tak te awmna hmun a ni,  a ti a. Tourism Minister a nih laia hmalakna lo awm hmanin tun dinhmunah par a chhuah chho mek chu a lawmpui thu a sawi. 

Health Minister chuan Tuipuiral chhunga PHC pali awm zinga pathum - Khawbung, Farkawn leh Sesih PHC chu a tlawh tawh thu leh, Khawbung PHC building sak thar chu hawn thuai a nih tur thu a sawi a. Khuallian hian zirlai kal khawmte chu fuihin, HIV/AIDS lakah inveng tur leh mahni invawng thianghlim tlat turin a fuih a ni.

Khuallian Pi Lalrinpuii hian TZP kum 40 tlin lawmna puala buatsaih Souvenir a tlangzarh nghal bawk a ni. 

Khualzahawm Pu Ramthanmawia pawn thu sawiin, Tuipuiralin zirlai chawimawi tur an nei thin chu lawmawm a tih thu leh, mi tam zawk chawimawi zel tur awm se a duh thu a sawi a, TZP chu pawl zahawm leh bial tana tangkai em em an nih thu a sawi. Khualzahawma hian a thusawi zawhah MLA Award, Mi paruk hnenah Laptop a hlan nghal bawk.

Chawhma lam programme hi Pu Lalthangpuia, Vice President, TZP chuan kaihruaiin, TZP President C.Lalramchhana chuan thu a sawi a, General Secretary C.Remruatfela chuan report a pe a. TZP dintu C.Lalhluna bakah Pu B. Lalthangliana te leh TZP Ex-President Lalnunsanga te lawhin zirlaite fuihna thu an sawi.

Board exam-a distinction-a pass-te hnenah MLA Award - Laptop mi 6 hnenah hlan an ni a. Board leh University buatsaih exam hrang hranga top 10 ni pha mi 13 chu chawimawina an hlan bakah Mizo Award 2025 dawngtu B. Lalthangliana leh Mizo Idol 2025 Immanuel Lalremruata (Khawbung) chu an chawimawi bawk.

Chawhnu programme-ah MSACS atangin awareness campaign neih a ni a. A hmunah hian HIV/AIDS test nghal a ni.