2282/2026-2027

Aizawl, the 20th September, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan nimin khan "Engineering India's Global Footprint : Technology, Talent & Trust" tih thupui hmanga The Institution of Engineers (India) buatsaih IEI Industry &  Education Excellence Summit & Award 2026, SCOPE Convention Centre, New Delhi-a neih chu Khuallian niin a hmanpui. 

Larsap General (Dr) Vijay Kumar Singh chuan India ram hmasawnna rahbi zawhah engineer ten hmun pawimawh tak an chan thu sawiin, khawvel thiamna sang zelah ram hrang hrangte chu thil dehchhuah hralhna mai ni lo, thiamna neih leh mar pata tanlak kawngah an inel mek a ni a ti. India ramin thiamna leh theihna tam tak a neihte tangkai taka chhawr thiam a tul tih sawiin, engineering thiamna hmanga hnathawhte chu hna tha, tlo leh rintlak tia hriat hlawh a nih theih nan engineer-te theihtawp chhuah turin a chah a ni. 

Digital India, van sang boruak zirna leh thiamna, geospatial technology, defence engineering, artificial intelligence leh tunlai thiamna hrang hranga India dinhmun leh tun aia hmasawn tura engineer-te mawhphurhna leh tanlak ngaihna laite a sawi a. Engineer tam tak chher chhuah ringawt a tawk lo tih sawiin, engineer rawn chhuak zel turte chuan thiamna nghet tak an neihte zau zawka ngaihtuahna senga an chhawr thiam a tul a, degree an dawn zatah ni lovin enge an ngaihtuah chhuah theih tihah kan teh zawk tur a ni, a ti. India ram thiamna leh theihnate ram dang ten an rin ngam theih nan kan thil dehchhuahte a tha tawk em tih leh tehkhawng a pha em tih thlenga kan ngaih pawimawh a tul thu a sawi bawk.

Mizoram Larsap chuan India hmarchhak state-te chu hmun chhengchhia, a ram leilung venthawn ngai leh India rama hmun pawimawh taka awm an nih thu sawiin, engineering hna thawh kawngah harsatnate awm bawk mah se, hmasawnna thil thar leh danglam bik thlenna hmun remchang tak a ni thung tiin, hmarchhak ram leilung chhengchhe tak chu engineer tana chona leh a taka thiamnate lantirna a ni a, abikin Mizoramah hmasawnna ruhrel din turin tlangram chhengchhia leh sik leh sa laka him bakah tunlai thiamnate hman a tul a ni, a ti a. India ram hmalam thui tak chu engineer-te kutah a innghat tlat thu sawiin, ram changkang Viksit Bharat @2047 thlen theih nan theihtawp chhuah turin a chah a ni. 

He summit-ah hian industry hotu, policy siamtu, zirmi leh engineer-te telin khawvel pum engineering leh technology lama India ram hmasawnna leh pawimawhnate an sawi ho a ni.

Institution of Engineers (India) hi kum 1920 ah din niin, engineering peng hrang hrangte khaikhawmtu pawl lian ber a ni a. Tun dinhmunah engineering peng hrang hrang 15 atangin Corporate Member nuai 2 leh sing 6 chuang an awm a ni.