2283/2026-2027

Aizawl, the 21st September 2026: Vawiin khan Mizoram Assembly House Conference Hall-ah NITI Aayog chuan hmarchhak bial tan Regional Workshop – Strengthening SITs to drive Viksit North Eastern Region a buatsaih a, a hawnna inkhawm hi Chief Minister Pu Lalduhoma chuan telpuiin thu (keynote address) a sawi. Chief Minister hi Pu K. Sapdanga, Home Minister bakah Minister leh MLA- ten an tawiawm a ni.

Chief Minister chuan, NITI Aayog in State Support Mission hmanga Mizorama hma min lakpui hi kan tangkaipui hle a, Mizoram State Institution for Transformation (SIT) hi a tichak a, plan kan siamna kawngah te, a taka kan kalpuina kawngahte sorkar laipui hmathlir milin hma kan lak theih phah a.

NITI Aayog Governing Council hnuhnung berah khan State Support Mission Mizorama kalpui zel turin ka dil a, Mizoram State Assembly-ah ngei pawh State Support Mission (SSM) kan mamawhzia ka lo sawi tawh a. Ka dilna ngaipawimawhin NITI Aayog chuan kum 5 dang atan SSM hi min han pawhseisak leh ta a. Kan lawm hle a ni.

Mizoram hian kum 2047-a kan ram hmathlir document – Raltiang Ram kan tlangzarh tawh a, kum 2047-a India GDP a 1% lo thawhchhuah ve theih kan tum a. Kan tum ram hi a sang hle a ni. Tum ram (target) lo neih ringawt kha a tawk lo va, a taka tihlawhtling tura ke kan pen a ngai a. He kan tum ram thleng tur hian kan economy ruhrel hi thlak a ngai (structural transformation) tih pawh kan hria a ni. Kan tum ram min hruai thleng ngei tur ruahmanna (plan) chu SIT hmangin kan siam a. Chu mi hre rana ke kan pen tlan theih nan Minister zawng zawngte tana intuaitharna (retreat) pawh buatsaih kan tum mek a ni.

Hmarchhak state te hian Viksit Bharat hmathlir tihhlawhtling turin mahniin engkim kan ti vek thei lo va, kan zaa kan tanho a, kan thawhho zel a ngai a. Mizoram phei chu International ramri pahnih karcheha awm kan ni a. Hmarchhak bial huapa hma kan lakho a tulna hi a tam hle. Vawiina kan workshop hian hmarchhak bial anga kan thawhhona tur tam tak min khawhhmuh dawn a, kan kal dan tur pawh kan ngaihtuahho thei dawn a ni, a ti. Workshop an buatsaih avangin NITI Aayog State Support Mission chungah lawmthu a sawi a ni.

A hawnna inkhawmah hian Dr. KS Rejimon, Mission Director, SSM, Niti Aayog chuan an Workshop buatsaih chhan sawihawnna a nei a, Dr. Joram Aniya, member NITI Aayog, Pu Khilli Ram Meena, Chief Secretary leh Pu Vanlaldina Fanai, Commissioner, Planning & Finance ten thu an sawi a. Dr. Amrit Pal Kaur, Public Policy Specialist chuan lawmthu sawiin inkhawm a khar a ni.

A hawnna inkhawm tawi neih zawh hian Dr. Shashank Shah, Senior Specialist, NITI Aayog chuan state hmathlir siam dan tur (formulating state vision – roadmap 2047) thih thupui hmangin thusawina a nei a, Pu Sambuddha Goswami, Consultant chuan District Domestic Product estimate dan leh Primary sector GDP estimate dan a sawi a. Chawhnu lamah SSM hmanga SIT tihchak dan zirhona leh sawihona an nei zui leh a ni.

He workshop- ah hian hmarchhak state zawng zawngte State Institution for Transformation (SIT) te an tel a, Mizoram sorkar official pawimawh thahnemtak an tel bawk a ni.