2284/2026-2027

Lawngtlai, 21st September 2026: Vawiin khan Lawngtlai Bawrhsap Pu Donny Lalruatsanga kaihhruaiin a Office Chamber-ah Dan lova ramri kaltlanga sumdawnna leh bungraw phurh chungchangah thutkhawm neih a ni.

Pu Donny Lalruatsanga chuan kalkhawmte chibai bukin sumdawnna kawngah dan mumal tak zawm a nih theih nan theihtawp chhuah a tul takzet a ti a. Lawngtlai District- atanga Myanmar lama bungraw phur leh sumdawnna kalpui thin ten dan ang thlapin an kalpui em tih uluk zawka endik bakah dan bawhchhiate dan anga hrem an nih tur thu a sawi a. A bik takin India khua leh tui ni lo, lirthei khalh leh mi hming hawha lirthei lei bakah lirthei rûkbo leh zawrh chhawn an awm thin nia thuthang pawh uluk taka chhuichian a nih tur thu a sawi a ni. Bawrhsap chuan Lawngtlai District- chu International Border - a awm anih angin, khauh zawka dan leh thupek kenkawh a ngaih thu sawiin, District Administration chuan theihtawp a chhuah zel tur thu sawiin, Tlawmngai Pawl hrang hrangte leh Lawngtlai mipuite thawhpuiah a sawm nghal bawk.

Thutkhawmah hian Addl. SP, Taxation Officer (LADC), Assam Rifles, CYLA leh AOC YLA Branch- atangin report ngaihtlak niin, hmalakna tur kawng hrang hrang sawiho nghal a ni a. District Administration, Mizoram Police leh LADC - ten theihtawp chhuah chhunzawm se, a bik takin ramria awm YLA Branch - leh NGO dangte pawhin theihtawp chhuah a pawimawh tiin, thawhhona tha neih chhunzawm zel ni se an ti a. Mizoram chhung leh ram pawn atanga lirthei bo report - tam tak bawhzui a nih tawh thu leh hemi kawngah hian AOC Veng YLA Branch- te an thawkrim thin hle tih ngaihthlak niin, chak zawka hmalak ho zel ni se an ti, a ni.

KMMTTP Kawngpui zawha Zorinpui kaltlanga Myanmar nen a sumdawnna kalpui thinah hmalakna tur a tam hle tih pawm tlangin, hun lo awm turah sumdawnna hmun lian leh pawimawh ber a la nih dawn avangin dan leh thupek kenkawh kawngah khauh taka hmalak tha an ti tlang a. Hemi kawngah hian sawrkar hmalakna kawng hrang hrangte puihbawm turin NGOs a bik takin CYLA leh YLA Branch - te an pawimawh dawn hle tiin, ram leh hnam, mipuite him nan kawng engkimah thawhho ni se an ti a. Chak zawka hmala turin District Administration - atangin thupek (Order) khauh taka chhuah ni se, a bawhzui kawngah theihtawp chhuah tlân ni se an ti bawk a ni.

Vawiin thutkhawmah hian Addl. Superintendent of Police; SDO (S); Warrant Officer, Assam Rifles; Taxation Officer (LADC); Office Bearers CYLA leh AOC YLA Branch bakah MJA Lawngtlai te an tel a, Bawrhsap chuan lawmthu sawiin hun a khar.