1639/2025-2026

Dated Aizawl, the 29^th September, 2025 : Tukin khan Health Minister Pi Lalrinpuii leh Power Minister Pu F. Rodingliana te chuan Mizoram mipuite damdawiin pan nasat ber – Civil Hospital, Aizawl an tlawh a. Tun hnaia power lama he damdawiin in harsatna an tawh te chu a hmunah enpuiin, a sutkian dantur te an sawi tlang nghal a ni.

Civil Hospital hotute chuan Minister-te hi lo dawngsawngin,  he damdawiin hi Mizoram damdawiin zingah pawh mipuite pan nasat ber anih avang leh tunlai khawl changkang chi hrang hrang CT Scan, MRI, te bun anih bakah Dialysis Centre, Operation Theatre bakah ICU ah te power mamawh reng anih thu te, Cath Lab peihfel tep tana power chawllo a mamawh anih dante an sawifiah a, tunhnaia Damdawiin Generator lian a chhiat avanga power lama harsatna an tawh dan leh mipui damlote nasa taka a nghawng dan te an lo hrilh a ni.

Minister-te chuan Civil Hospital-a power hmanna chi hrang hrang – CT Scan, MRI, Dialysis Centre leh ICU te bakah Operation Theatre te an tlawh a, He damdawiin tana Electric VIP line mamawh anih dan te, Line thar atanga Civil Hospital tana darkar 24 khaihlak lo a power pek dan tur ruahman nghal a ni.  Hemi atana sum mamawh tur te pawh a rang thei ang bera Sawrkar dil an tum thu an sawi bawk.  He damdawiin hian Electric VIP line an pawt thei anih chuan power awmloh avanga damlo mipuite harsatna nasa tak thleng thin hi a chhawk zangkhai ngei a beiseiawm hle a ni.

PMJVK sum hmanga Civil Hospital Block A leh Block B sak dantur tlangpui bakah Trauma Centre a insuan lut tura hmalak ngai thenkhat a hmunah an thlir ho bawk.

Power Minister chuan - Civil Hospital compound a high mast awm, hun rei tak chhung chhe tawh pawh a rang thei ang bera siam that dan kawng zawn anih tur thu a sawi a, Mipuite aiawhin Civil Hospital hotute chuan lawmthu an sawi nghal bawk.

He hunah hian Health Minister leh Power Minister te hi Department Officials – DHME Director – Dr S. Ngurchamliana, Sr Medical Superintendent – Dr Lalchhuankimi, Er JH Malsawma, Engineer in Chief, Er Ngursailova, Chief Engineer, Er Zodingliana, SE, Er Lalrinmawia SE te bakah Department pahnih a officials ten Minister-te hi an tawiawm a ni.