326/2025-2026

Aizawl dated 25th April 2025: Vawiin chawhma khan SAPE buatsaihin, ni hnih awh tur 15th Education Fair chu Minister Pi Lalrinpuii'n Millennium Centre chungzawlah a hawng a. Pu Sanjay Thapa, Director, SAPE chuan Education Fair hawnna hun hi a kaihruai a ni.

Health & Family Welfare Department Minister Pi Lalrinpuii chuan Mizo zirlaiten zirna sang zawk an chhunzawmna tur a State pawn zirna in tha leh changtlung tak tak, an hmelhriatna tur leh belhchian theihna tur hun tha buatsaih a ni chu lawmawm a tih thu a sawi a. 15th Education Fair buatsaih chuan Mizo thalaite zirna sang zawk an chhunzawmna kawnga an kalna tur awm inkawhhmuhna hun pawimawh tak a nih ngei a beisei thu a sawi bawk a ni. 

Pi Lalrinpuii chuan zirna sang zawk zir zawm tura zirlaite kan inbuatsaih lai hian kan thiam zawng leh tui zawng thlan a pawimawh rualin eizawnnatlak hna min pe thei tur thiamna kan thlan thiam a pawimawh thu a sawi a. Health Sector-ah Dialysis technician leh thiamna bik ngai hna hrang hrangah thawktu duh ang an awm loh thin thu Minister chuan sawiin, ngaihtuahna thui tak seng chungin, khawtlang leh mipui mamawh thiamna nei thei tur zirna thlan thiam a tul thu a sawi. 

Health Minister chuan 15th Education Fair-a state pawn atanga zirna in hrang hrang inphochhuakte hnuai a zir theih tam tak chu Mizo zirlaite la hmelhriat tam loh a nih avangin zirlai tam thei ang berin he hun hi chhim a, tangkaipuitu nih tum tura a duh thu a sawi a. Technical course hrang hrang bakah Mizo thalaite hna zawn kawnga pui thei tur, Maritime Education, Indian Army leh Indian Airforce thlenga an inchhawpchhuak chu lawmawm a tih thu a sawi.

Millenium Centre chungzawl a 15th Education Fair buatsaihah hian Mizoram pawn atangin University leh College 30 chuang an inphochhuak a. Heng zingah hian Amity University, Kolkata, Sharda University, Assam Down Town University, Parul University, Indian Maritime University leh Uttaranchal University-te an tel a ni.