DIRECTORATE OF INFORMATION & PUBLIC RELATIONS, Government of Mizoram, India

421/2026-2027

Lunglei, 2026 Ṭomir thla ni 7: Lunglei Municipal Council (LMC) Ward VI huam chhunga zirna kawnga hmasawnna lian tham thlen tura hma lakna tur, Project Lamlian chu vawiin khan Lunglei Electric Veng YMA Hall-ah Mizoram sawrkara Health & Family Welfare Minister Pi Lalrinpuii'n a hawng.

Khuallian Pi Lalrinpuii chuan LMC-in Councillor ṭhalai thluak fing, a ngaihna hria leh thil thar duang chhuak thei an nei tih a taka a lang chho zel chu lawmawm a tih thu sawiin, Ward Number 6-na Councillor-in a ward a hriat chianna leh a bulṭhut aṭanga hmasawnna rem chhoh a tum dan chu fakawm a tih thu a sawi a. Hmasawnna dik leh ngelnghet nei turin a bulṭhut dik a pawimawh thu sawiin, zirna lamah pawh a bulṭhut – naupang lam, primary school aṭanga ṭan a, nasa zawka hma lak a ngaih thu a sawi a. LMC Ward VI chhungah primary school-a zirna ṭha zawk thlen tura, syllabus pangngaiin a huam si loh, mahse ṭangkai si – English zirna te, nun dan phung (life skills) zirna leh hma hun inkawhhmuhna (career guidance) thlenga kalpui tura ruahmanna bakah, smart classroom leh chuktuah huan (Poshan Garden) neih theihna tur project te kalpui a ni ta chu lawmawm a tih thu a sawi a. Project hlawhtlinna atan zirtirtute an pawimawh dawn hlea a hriat thu sawiin, zirna in nuam din leh zir dan tihchangkan kawngah te project thil tum a hlawhtlin nan theih tawp chhuah thar turin zirtirtute a chah.

LMC Chairman Pu Lalzuithanga chu Khual Zahawm niin, LMC Ward VI-in Project Lamlian an kalpui ṭan tur chu lawmawm a tih thu leh Lunglei leh ramin hma a sawn phah ngei a beisei thu a sawi a. Ward dang tan pawha entawn tlak leh sulsutu ni turin Project chu hlawhtling taka kalpui turin duhsakna a hlan.

LMC Ward VI Councillor Pu R. Lalremsiama chuan Project Lamlian hawnna inkhawm hi kaihruaiin, Project nihphung a sawi fiah a. Project Lamlian chuan thil tum lian tak tak panga a neih thu sawiin, naupang tana tuiawm tur zir dan kawng thar duan, zirna hmanrua tihchangkan, zirlai leh zirtirtute'n zirna in an ta neih theih nana hma lak, zirna in nuam leh felfai buatsaih leh mihring nun kawng kawhhmuhna lam uar te a nih thu a sawi a. Project tihhlawhtlinna turin English zirtirna kawngah DISHA Foundation nen; PM Poshan Garden buatsaih kawngah Horticulture leh Agriculture Department nen; Dan leh Career Awareness pek kawngah Legal Services Authority nen; zirna in hrisel, fai leh thianghlim buatsaih kawngah Health Department leh Education Department te nen an thawk ho dawn tih a sawi a. He'ng bakah hian Ward chhunga zirlaite tan ruahmanna ṭha tak siamin, Education Grievances Code an kalpui dawn tih sawiin, zirna kawnga harsatna neite chuan QR Code scan-in, chutah chuan an harsatna an ziak lut ang a, Ward Committee-in an harsatna chin fel dan tur an zawnpui thei dawn tih a sawi.

He hunah hian Pu David Lalmuanzuala kaihhruaina hnuaiah Lunglei Electric Veng school aṭanga zirlai ti ṭhate lawmpuina hlan a ni a. Electric Veng Local Council Chairman leh Branch YMA ai awh te'n thu sawiin, Ward Committee Secretary Pu Trinity Hrilliana Khiangte chuan lawm thu sawiin hun a khar.

Attachment