DIRECTORATE OF INFORMATION & PUBLIC RELATIONS, Government of Mizoram, India

422/2026-2027

Lunglei, 2026 Ṭomir thla ni 6: April ni 5 zan khan Lunglei Rahsiveng Local Council Hall-ah Healthy Lunglei District Campaign hnuaia ni 40 awh hriselna chungchang inzirtirna leh LushAI Healthy Lunglei App tihlar beihpui thlak tur, 40 Days Healthy Lunglei Campaign hawnna hun hman a ni.

YMA Rahsiveng Branch President Pu H. Lalhmachhuana'n hun a kaihruai a. Election Officer/District Urban Development Officer Pi Lalhruaitluangi'n Campaign hi hawngin, Healthy Lunglei District Campaign hma lakna chu Lunglei District mipuite tana hriselna kawnga hmasawnna leh awlsamna atana ruahman a nih thu a sawi a. District mipuite chu nunphung hrisel nei tur te, hriselna tichhe thei hrang hrang laka inthiar fihlim tur leh LushAI Healthy Lunglei App chu hman ṭangkai tum ṭheuh tur te'n a chah.

Lunglei District Immunisation Officer Dr Christina Zonunmawii chuan natna inkai chhawn theih loh (non-communicable disease) chungchang te, NCD laka inven dan leh nunphung hrisel neih pawimawhna te, hriselna atana tih tur leh tih loh tur hrang hrangte a zirtir a. LushAI Healthy Lunglei App sawi fiahna leh application hman dan a taka inzirtirna buatsaih a ni bawk.

He hunah hian YMA member leh khawtlang mipui mi 50 chuang an tel a. Medical Team te'n hriselna dinhmun endikna (health screening) buatsaih chhunzawmin, mi 20 te hriselna dinhmun endik a ni a. Kal khawmte hian a hmunah LushAI Healthy Lunglei App chu an mobile phone-ah an dah lut (install) nghal bawk.

40 Days Healthy Lunglei Campaign kalpui chhung hian YMA branch hrang hrang leh college-ah te hriselna dinhmun endikna (health screening) te, hriselna leh LHL App chungchang inzirtirna leh intihsiakna te buatsaih ṭhin a ni dawn a. Ni 40 chhunga campaign zawh hnuah App download tam leh hmang ṭhate hnenah lawmman siam tum a ni bawk.

LushAI Healthy Lunglei app hmang hian district chhunga sawrkar damdawi in leh health centre-a daktawrte ṭhut hun tur a en theih bakah, OPD-a inentir turin appointment a lak lawk (book) theih a. ABHA-a inziah luhna te, he app-a inziak lut damdawi dawr (pharmacy)-te aṭanga damdawi chah theihna te awmin, hriselna lama hriat tur pawimawh hrang hrangte pawh awlsam takin a hmuh theih a. OPD appointment laknaa pui thei tur leh zawhna hrang hrang Mizo ṭawnga chhang thei tur AI chatbot dah tel a ni bawk a. Android hmangte tan https://play.google.com/store/apps/details?id=com.lushaihealthylunglei.android aṭangin leh iOS hmangte tan https://apps.apple.com/in/app/lhl/id6755673586 aṭangin download theih a ni.

Attachment