426/2026-2027
Dated Aizawl the 7th May. 2026 : Vawiin May 7, 2026 chawhnu dar 2:30 khan Standardized Assessment for Elementary Schools (SAfES) 2026 Report, SCERT buatsaih chu Pu David Lalthantluanga IAS, Secretary, School Education Department -in a pisaah a tlangzarh.
He SAfES Report tlangzarh inkhawm hi Pi Caroline Zoramthangi, Director, SCERT-in kaihruaiin SAfES buatsaih a nih chhan leh a tumte a sawi a. SAfES hi Dr. Vanlalthlana, Minister, School Education Department hmalakna pawimawh tak niin, Mizoram elementary school-a classroom zirtirna leh zirna tihhmasawn nana buatsaih a nih thu a sawi.
Pi Zoramthangi Ralte, Joint Director-in SAfES report pe a. SAfES 2026 hi Pawl V leh Pawl VIII third term exam atan buatsaih a ni a, Sub-Divisional Education 20-ah assessment hi neih a ni a. Middle school 733-a Pawl V zirlai 7889 leh Pawl VIII zirlai 7218 ten he exam hi an pe a ni.
SAfES hi zirlaiten an zirlai an pass leh fail hriatna atan emaw, school mal performance tehna tur emaw-a duan a ni lo va. A tum ber chu zirlaite dinhmun dik tak hriat a, naupangten zir chhuah tura duan sa eng chen nge an thlen tih leh, naupangte performance en chunga hmasawn zel dan tur hriatna atana hmalakna a ni.
Pu David Lalthantluanga IAS, Secretary, School Education Department chuan he exam felfai taka kalpui a nih hnua report kimchang a bu-a SCERT-in a buatsaih hi lawmawm a tih thu a sawi a, “He report atanga lang chiang tak chu Education Minister academic lama a ngaihna kan nei hian zirna tha leh changkang nei turin ke kan pen a, hma nasa takin kan sawn zel a ni tih a entir a. He assessment system hi a that em avangin class tinah neih theih ni se, tuna la hmang ve rih lo private school te pawh hian an hman ve thuai a rinawm.” a ti bawk.
