415/2026-2027

Lunglei, 2026 Ṭomir thla ni 7: Lungleia Bethesda Higher Secondary School chuan vawiin khan Lunglei Chanmari-a UPC Conference Hall-ah kum 2026 Higher Secondary School Leaving Certificate (HSSLC) Examination result chhuaka an zirlai Class–Xll pass mi 74 te pualin Graduation Day 2026 an buatsaih a. Mizoram sawrkara Health & Family Welfare Minister Pi Lalrinpuii'n Khuallian niin a hmanpui.

Health & Family Welfare Minister Pi Lalrinpuii chuan Bethesda Higher Secondary School aṭanga HSSLC pass tharte leh zirtirtu leh Board Member-te lawmpuina leh duhsakna a hlan a. Mizoram sawrkarin Mizorama lar chho mek zirna hmanga sumdawnna (Commercialisation of Education) tihnep tuma hma a laknaah kuminah MBSE result bu-ah top 10 tar lan a ni ta lo tih sawiin, school hrang hrang chu pass percentage neih ṭhat leh top 10-a tling neih tamah ringawt inel lovin, chhawr tlak zir chhuak (alumni) neih ṭhatah te inel ṭhin zawk se a duh thu a sawi a. Zirlaite chu anmahni leh an chhungkaw tan rin tlak, rin ngam ni a, eng hna pawh thawk se hlawhtlinna tluantling nei thei tura taima taka an zirlaite bei zel turin a fuih a. Khawvel chu a chak chak emaw, a fing fing emaw din chhuahna ni ngawt lovin, danglamna mila inher rem thiam apiang vanneihna a nihna hmu thiam turin zirlaite leh zirtirtute fuihin, zirlai hlawhtling tharte chu tun lai mila inher rem chho zel a, hnain thiamna a phut leh ei zawnna atana hman theih tur zirna course thlang thiam turin a chah.

Minister Pi Lalrinpuii chuan Mizoram sawrkarin mipuite tan kawng hrang hrangin hma lakna a kalpui tih sawiin, sawrkar hmasa lam aṭanga kalpui, mi rethei "BPL" tan buhfai KG khat cheng 3-a pek chu tun sawrkar pawhin a la chhunzawm char char avangin Mizoramah thingtlang kilkhawr ber thlengin tu mah ei tur nei lo, chhuanchham, meialh en kan awm lo tlangpui tih a sawi a. Thihna a awm a, mi dang sum puk emaw, MLA-te tihbuai emaw a ngaihna ṭhin ber "Ruang phurh" chu sawrkarin kutken a, thingtlang mi rethei zawkte in luma ruang thlen a ni ta chu lawmawm a tih thu sawiin, Mipui Healthcare (MUHCS) avanga mi rethei leh harsa zawkte'n sum sen ngai lova damdawi ina an inenkawl tak avanga an lawm leh hlim hmelin chakna thar a pek ṭhin thu a sawi a. Hetih rual hian Mizoram chu ruihhlo leh HIV/AIDS-in a run mek avangin fimkhur leh ṭan lak a ṭul thu sawiin, ṭhalaite chu ruihhlo laka inthiar fihlim tur te, tihdamna awm lo, awlsam taka inven theih si natna HIV/AIDS lakah inveng tur te, insum, kawppuite laka rinawm, insum thei lo tan invenna (condom) hman leh kawppui turte dinhmun inhriat chian nana nupui pasal innei turte'n HIV test hmasak te ngai pawimawh turin a chah.

Bethesda HSS Graduation Day 2026-ah hian he sikul aṭanga zir chhuak (alumna) Dr Gospel Lallawmzuali chu Khual Zahawm niin, zirlaite fuihna thu a sawi a. Rev. Dr F. Sangvela'n hunserh hmangin, Principal Pu Lalnunsanga Pachuau chuan inlawmna thu a sawi a. Managing Board Member Pu Lalrotluanga bakah, zirlai nu leh pate aṭangin thu sawi ngaihthlak niin, zirlai chhuak tur T. Lalrindiki (XII Arts) leh K. Lalrinfela (XII Science) te'n inthlahna thu (valedictorian speech) an sawi a. Rosalind (Class–X) leh Edelyn (XII Commerce) te'n kal khawmte zaia awiin, Bethesda Cultural Club-in lam an entir bakah, Bethesda Choir te'n hla an rem bawk a. Miss Vanlalsiami'n lawm thu sawiin hun a khar.

Bethesda HSS hian kumin HSSLC exam result chhuakah Class–Xll Arts zirlai mi 48 aṭangin zirlai 47 hlawhtlinna chang an nei a. Class–Xll Science zirlai mi 30 te pass vekin, Lunglei District-a Science Stream pass vek nei school awm chhun an ni a. Nikum aṭanga hawn ṭan Commerce Stream-ah pawh an vawi khat exam-naah 100% pass result neiin, zirlai mi 8 te an pass vek bawk.

Bethesda HSS aṭang hian kum tin coaching hranpa kal lova class-a zirtirna aṭanga Joint Entrance Examination (JEE) inziak tling an nei ziah ṭhin a. Kuminah pawh an nei leh a ni.