416/2026-2027

Dated Aizawl, the 7th May, 2026: Vawiin khan Champhai South MLA leh Territorial Army Establishment & Coordination Committee Chairman ni bawk Lt.Col.(Retd) Clement Lalhmingthanga hovin Secretariat Conference Hall-I, MINECO-ah Mizo Territorial Army(Mizo TA)lak tharte thlahna hun (Flag-off ceremony) buatsaih dan tur leh an chenna tur (accommodation) chungchang thlirhona meeting neih a ni.

He meeting-ah hian department hrang hrang aiawha kal official-te chuan Mizo TA tana hma an lakna hrang hrangte, an harsatna tawhte leh chung harsatnate sutkian dan tur kawng hrang hrangte an sawi ho a. Hemi bakah hian, TA-te chenna hmun lailawk chu tun aia changtlung leh nuam zawka siam danglam dan tur chungchangte pawh an sawi ho bawk a ni.

MLA Lt.Col.(Retd) Clement Lalhmingthanga chuan Mizo Territorial Army chu hmanlaia 'Zawlbuk' kan neih thin, tunlai thiamna nena chawhpawlh (modernized version) a ni, a ti. Territorial Army recruitment pawh dik taka kalpui niin, duhsak bik leh inbumna tel lova neih a nih thu a sawi a. Mizo TA program hi thalaite leh an chhungte, khawtlang leh kan ram hmasawnna atana tangkai tur a nih thu leh, TA-te tana infrastructure dinte hian a dinna hmun leh kan ram economy hmasawnna a thlen tur thu MLA chuan a sawi a. Sorkar official-te chu Mizo TA program tihchangtlun nan theihtawp chhuah lehzual turin a ngen a ni.

Mizo TA-te flag-off ceremony hlawhtling taka neih a nih theih nana hmalak dan turte meeting ah hian sawiho a ni a. Flag-off ceremony hi May ni 11(Thawhtanni) ah Assembly Annexe Building Conference Hall- ah neih tur a ni a; hei hi 166 Infantry Battalion Territorial Army(Home & Hearth), Assam-a thawk tur, Mizoram atanga recruit batch hmasa ber, mi 144 (mipa 135 leh hmeichhia 9) thlahna hun tur a ni.