1245/2026-2027

Aizawl, dated 1st July, 2026: Vawiin khan Directorate of Health Services, MINECO-ah National Immunisation Day 2026 Pulse Polio Programme chu Health & Family Welfare Minister Pi Lalrinpuii chuan khuallian niin a hawng a ni.

Minister Pi Lalrinpuii chuan thu sawiin, CMO, SNO, Director-te, Senior Officer-te leh Primary leh Sub-Centre enkawltute zawng zawng thawhṭhat vanga vawiin hun thleng thei kan ni chu lawmawm a tih thu a sawi a. India ram chu kum 2014 aṭang khan Polio-free a lo puan tawh a ni tiin, Mizoramah pawh vaccine lakna chang kan hriat tawh zia leh kan ngaih pawimawh zia sawiin, 'Polio Free State' kan nih reng theihna turin ṭan lak zel a pawimawh thu a sawi bawk. Prime Minister-in a tlangzarh tawh HPV vaccine pek ṭhatna kawngah Mizoram chu India ram pumah pathumna kan nih thu a sawi a, hemi kawngah hian ṭan la zual a, pakhatna ni ngei thei turin kalkhawmte a fuih a ni.

Minister chuan Mizoram mipui zat hi nuai 16 vel chauh kan nih avangin healthcare hi ṭha takin kan kalpui thei a, mipui pawhin sawrkar min beiseina a sang hle a ni, a ti. Mipui kan tlem rualin hriselna dinhmun tehnaah pakhatna kan nih reng nan ṭan lak a pawimawh thu a sawi a. Vawiinah veng tinah hriattirna chhuah a nih hnuah nu leh pa tam takin polio vaccine dawng turin an fate an rawn hruai chu lawmawm a tih thu a sawi bawk. NQAS Certification leh IMR, MMR-ah te Mizoram chu a ti ṭha pawl kan nih avangin 'Eligible State' zinga kan tel thei chu ropui a tih thu sawiin, frontline worker-te leh medical officer-te hmalaknaah lawmthu a sawi bawk a ni.

He hunah hian Health & Family Welfare Department Addl. Secretary Pi Lalnunmawii Ralte chuan thu sawiin, Polio chu naupangte ti zeng thei natna hlauhawm tak a ni a, tui leh ei leh in bawlhhlawh aṭanga kai darh theih a ni, a ti. Kum 5 hnuai lam naupang zawng zawngte chu National leh Sub-National Immunization Day-ah te Polio drop pek ṭhin an ni tih a sawi.

Polio hi India ram bikah kum 2011 khan hmuh hnuhnun ber a ni tawh a, ram ṭhenawm- Myanmar, Bangladesh, leh Afghanistan-ah te hri a la len avangin kan ram hi inven fimkhur kan la mamawh reng a ni, a ti bawk. India ramah June 28 hi National Immunisation Day (Pulse Polio Day) atan hman ṭhin niin, kuminah hian Mizoram district 11-ah hman mek a ni a. Kumina target chu naupang 102,830 niin, an puala immunization booth 1,430 neih a nih thu a sawi bawk.

Vawiin hunah hian naupang kum 5 hnuailam mi 19 hnenah Polio vaccine drop hi pek nghal an ni.

He hun hi Directorate of Health Services Jt. Director (EPI) cum State Immunization Officer Dr. Zoramruati Ralte chuan lawmthu sawiin a khar a ni.