1246/2026-2027

Aizawl, 1 July 2026: Nimin khan Public Health Engineering (PHE) Minister Prof. Lalnilawma leh Embassy of Israel, MASHAV – Israel’s Agency for International Development Cooperation-a Senior Water Resources Specialist Pu Neeraj Gahlawat-te chu Mizoram House, New Delhi-ah an inkawm. Inkawmhonaah hian Mizoramah tui thianghlim zawk mipui hnena pek theih dan tur te, tui hmanhnu (wastewater) tihthianghlim dan tur te, tuihna humhalh leh siam belh dan kawngte bakah environment humhalhna kawngah thawhho dan tur ngaihtuahho a ni.

Minister Prof. Lalnilawma chuan Mizoram dinhmun hriatchian nan remchang hmasa berah MASHAV hotute chu Mizoram rawn tlawh a zirchiang turin a sawm a, a taka thawhho theih dan kawng zawna hmalak vat a ṭul thu a sawi a ni.

He inkawmhonaah hian India leh Israel thawhhona programme MASHAV hnuaia Embassy of Israel leh Mizoram Sorkar inkara water sector-a thawhhona tih chak zêl dân tur leh hmalâkna tûrte ngaihtuah a ni a. Embassy of Israel chuan Israel ramin a neih, tui enkawlna hmanraw thar leh hmasawnna hmanga India ram leh State Sorkar hrang hrangte nena thawhhona a kalpui mek angin Mizoram nen pawh thawhhona neih tum a nih thu an sawi a ni.

Embassy of Israel chuan Aizawl khawpui chhunga tui thianghlim lakna hmun, chhan hrang hrang avanga chhe mekte thlang chhuak turin a ti a. Thlan chhuah a nih hnuah Israel thiamna leh hmanraw thar hmangin a hmunhma siamṭhat leh humhalh zui dan turte enfiah a ni ang a, a taka hnathawh theih dan tur (technical feasibility) leh sum awm dan (funding) a zirin pilot project te, zirtirna (capacity-building), leh sum hnar zawnna (resource mobilisation) thlenga thawh ho zui theih dan tur kawng zawn a nih tur thu an sawi bawk a ni.

He hunah hian Minister Prof. Lalnilawma hi New Delhi Mizoram House-a Additional Resident Commissioner Pu Alexander V. Chongthu leh Mizoram sawrkara Additional Secretary Pu V. Lalengmawia ten an ṭawiawm a ni.