Vawiin chawhma khan Directorate of Health Services Conference Hall ah Health Minister Pu Lal Thanzara hovin National Health Mission hnuaia nu leh nau hriselna tura sawrkar hmalakna programme pakhat, Reproductive Child Health(RCH) Programme in April 2014 atanga September 2014 thlenga hma a lak dan leh hmasawnna te thlir hova hmalak zel dan tur rel a ni. RCH Review meeting hian ni 2 awhin naktuk hian a tiak dawn a ni. Dr.K.Ropari, Principal Director, H&FWD, Dr.Rohmingthanga Ralte, Director, DHS leh Dr. Lalbiakkima, Director, DHME ten review meeting hi kaihruaiin district 8 atangin Medical Superintendant leh Chief Medical Officer-te bak ah National Health Mission hotute an tel a ni.

Review Meeting hmanpuitu Health Minister chuan ram leh hnam hmasawnna lungphum pawimawh ber te zinga mi hriselna kawnga hnathawktu, Health Department chuan a mawhphurhna a hlen ngei ngei a ngai a, Healthcare programme hrang hranga a hmalakna ah a hnungtawlh thianglo mai nilovin hma a sawn zel tur a ni a ti a. Mipui vantlang hriselna tura hmalakna kawngah nu leh nau hriselna chu a hnuk tih theihin a pawimawh a, infant mortality rate(IMR) leh Maternal Mortality Ratio(MMR) phei chu tehfung pawimawh lutuk a nih avangin a thang tur a ni lova a lo hniam zel nan theihtawp chhuah tlan a ngai a ni tiin CMO leh Medical Superintendant te chu an harsatna hrechiang a hmala nghal turin a hrilh a ni. Mihring dam hun chhunga hriselna pan lai leh chakloh lai ber hun chu naupai lai leh nausen hun lai hi a nih avangin 'nu leh nausen te chu vulnerable group of society' tih hial an ni a, ngaihven bik an ngai a, an dinhmun that a zirin hriselna kawnga ram mipuite hmasawnna pawh teh a ni a ti. Thawktu indaihlohna tam tak awm mahse tuna thawk mek te an tanrual thiam phawt chuan nasa takin hna an thawk thei a ni tiin CMO te chu an awmna district theuhvah team work tha zawka kalpui turin a chah a. Registrar General of India, SRS 2013 tarlan dan chuan Mizoram IMR chu a vantlang pawl, 35 ni mahse thingtlang leh khawpui ah inthauhna a zau lutuka nasa zawka hna thawh a ngai a ni tih a chiang a ni a ti. IMR tih hniam nan a monitoring kalpui nan Central tanpuina kaltlanga State in a dawn lirthei-te chu hman tangkai ni se, thingtlang leh hmunkil khawr ah te hriselna kawnga uar zawka mipuite zirtirna kalpuina leh mipuiten sawrkar atanga health benefit an dawn theihte hrechiang se nasa takin hma kan sawn thei ang a ti a. Health Minister chuan Health Department hnuaia programme hrang hrang te chu inlaichin vek, pakhat a chhiat chuan adang ah pawh tlak hniam theihna thlen thei a ni tiin Department mi leh sa programme hrang hranga thawkte chu in hrechiang tur leh inpawhtlang taka thawk ho turin a chah a ni. Specialist mamawhna a sang a, district thenkhat a Specialist Doctor awmlohna leh a chhan te enfiah a ni tawh a, rualkhai zawkin doctor posting siam a ni anga hard posting bika Doctor te awm rei chhung pawh awmze nei a siam a ni ang a ti.

Dr.R.Lalthanga, State programme officer, RCH chuan April 2014-September 2014 chhunga RCH half yearly report a pe a. Report a tarlan dan chuan April 1, 2014 ah khan Mizoram a mihring 11,37,684/- zing ah hmeichhia, sawrkar phalna anga kum tling pasal neia fa nei thei chin 1,35,495/- an awm a ni. April-September 2014 chhung khan Damdawi in(Health Institution) ah naupai 12,628/- an inziak lut a.April-September 2014 chhung tho hian nungdama naupiang 1,07,60/- zinga 9780 te chu damdawiin a piang niin chung zinga 524/- chiah 2.5kg tling phalo an ni a. Nausen 10,069/- te chu an pian atanga darkar khat chhungin hnute hnektir an ni. Nu nau nei 88% te hi an nau neih hnu ni 2-na atanga ni 14-na inkar chhungin an chenna in lamah te Health worker ten an kan thei nia tarlan a ni a.RCH half year report huam chin chhung hian mipa insiam report a awm lova, hmeichhe insiam 857 awm tawhin indanna copper-T dah 1314 an awm thung. April-September 2014 chhung hian Nu- naupai kaihhnawih a thi zat (Maternal Death) 13 awm in MMR 121 a ni a, nausen kum 1 hnuailam thi(infant death) 387 awm tawh in IMR 36 a ni a. RCH programme kaihhnawih a thawktu training nei tawh 719 zingah Paedetrician-8, Gynaecologist-14, Anesthetist-15, medical officer-9, BeMOC Trained Doctor - 43, F-IMNCI trained doctor-59,EmOC trained doctor 9,LSAS trained doctor-9 leh Ayush Doctor 32 te awm in ani puih tur hian staff training nei tawh 521 an awm bawk a ni. Review meeting ah hian District thenkhat IMR leh MMR a sang then khat awmte hmalak dan tur ngaihtuah ho a ni bawk a ni.