Vawiin khan Health Minister Pu Lal Thanzara chu a Office Chamber-ah Apollo Gleneagles Hospitals Kolkata aiawh an Business Development Manager Pu Somnath Bhattacharya leh a hoten an hmu a, inkhawm hona hun an nei. An inkawmhona ah hian Health Minister Pu Lal Thanzara chuan Mizoramin kal(kidney) lam doctor thiam ‘nephrologist’ a neih loh thu te leh Mizoramah kal lam natna leh kal thlak ngaite an tam tawh thu te a hrilh a. Apollo Gleneagles Hospitals aiawh chuan an Damdawiin in kal natna inenkawlna lamah doctor leh technician pahnih chu a thlawna an training tir theih thu Health Minister hi an hrilh.

Chuap cancer chungchangah Awareness Campaign Mizoram Sawrkar nen tangkawpa an buatsaih duhthu an sawi chu Minister chuan hemi chungchanga an mahni lam atangin a ruahmanna ‘Roadmap’ siam vat turin a ngen a. An inkawmhona ah hian Apollo Gleneagles Hospitals thiamna bik hrang hrang – Bone Marrow Transplant, Liver Transplant, Robotic Surgeries leh a dangte Health Minister chu hrilhin an damdawiin chuan Mizoram Sawrkar hnuaia thawkte tan ‘credit facilities’ an pek theih reng thu an hrilh bawk a ni. Health Minister hi Health Services Director Dr. Lalbiakkima’n a tawiawm a ni.